Recientemente National Airlines, un aerolinea di carga, a trece “burner booms” for di Belgica pa Aruba. E carga ta originalmente pa Corsou pero como cu na Aeropuerto Hato no tin un groundhandler capas pa baha e carga, a opta pa trece Aruba pa aki GenAir uza su ekiponan specialisa pa baha e carga di avion y laga hib’e waf.
E compania di carga National Airlines a aterisa diadomingo anochi na Aruba cu vuelo 4866 cu a sali pa 3:04 pm for di Liege, Belgica y a yega Aruba pa mas pa mas o menos 7:30 pm. E avion ta di marca Boeing modelo 747-4HAF (ER), specialmente pa carga. E avion ta registra na Merca y tin e codigo N663CA y tin 16 aña di existencia
Asina cu e avion a baha, GenAir, un di e ground handlernan na AUA Airport, a uza ekipo specialisa cu nan so tin den region, pa baha e carga largo y pisa, for di e nanishi di e avion, cu ta habri completamente. Asina cu a baha e carga, a transporta e carga pa waf na Barcadera.
Ey dialuna mainta Aruba Stevedoring Company (ASTEC), cu ta opera e waf di carga di Aruba, a percura pa subi e “burner boom” abordo di e barco Don Andres I, pa asina hib’e Corsou.
Cu e operacion aki, ASTEC a demostra su habilidad den maneho di carga specialisa. Henter e operacion a cana “smooth” garantisando siguridad di tur trahado y di e carga mes. ASTEC a anuncia riba nan pagina di Facebook cu “Nos ta dedica na entrega un servicio excepcional y logra cu clientenan ta keda satisfecho, danki na e experticio den maneho di tareanan complica di logistica”.
Asina un trabou cu tabata pa Corsou, como cu nos isla ruman no tin e infrastructura corecto di logistica, a pone cu companianan na Aruba a haya un negoshi extra, anto sin spera.
