No ta prome bes cu Jurgen van Schaijk a yega corte compaña pa su abogado. Por mira riba su cara con cansa e ta cu e situacion. E tin 20 aña ta lucha pa gobierno drecha e situacion na e planta di purificacion di awa na Bubabli. Awo e no por yega na otro conclusion cu “Gobierno ta mira problema en bes di busca solucion pa RWZI.” Esaki el a bisa hues tambe durante tratamento di e caso diamars atardi.
Un biaha mas el a bay corte pasobra e holo malo ta core cu su clientenan, e hotel ta perhudica y no ta mira cu gobierno ta haci algo concreto.
Den un declaracion duna pafo el a bisa cu ta un caminda di cruz el a cana pa mas cu 20 aña largo. “Nos tin problema cu e holo na e RWZI na Bubali y tin problema di musca. E idea di e ultimo 20 pa 30 aña cu nos tin asina hopi caso contra gobierno (DOW) y nunca nan kier soluciona e problema manera mester t’ey. P’esey nos t’ey aworaki atrobe.”
Y cu e hotel a sinti e efecto di e problema aki tur prueba ta mustra esey, segun van Schaijk. Basicamente e ocupacion ta baha, prijs pa camber ta baha y dado momento tur cos ta sali riba media social. “Y e hende no ta bin cerca nos mas. Nan ta mira online cu ta “hole stinki eynan” y nan no ta bin mas. Y fuera di esey, si nan bin mes, asina cu nan haya e holo, nan ta check-out. Esey t’e problema cu nos tin. Mas facil pa bisa: hende no kier keda na nos hotel.”.
Tin solucion pero a tarda pa yega na dje
Tin hopi solucion, segun e ta bisa, pero gobierno ta pensa den problema so. Nan ta reclama cu mester tin “beslissingsbevoegdheid”, cu pa nan mes por bin cu solucion, pero nan no ta bin cu ningun solucion. E hotel tabatin algun demanda inhoudelijk nan no a contesta ningun di nan. Te aworaki nada.
Loke e ta haya hopi fastioso cu nan ta luchando mas cu binti aña cu e problema aki y e apoyo di e sector ta limita. Ta papia di e organisacion AHATA di cual e ta miembro pa mas cu trinta aña caba. “Nan por a demostra apoyo door di uni nan mes den nos caso, nan por a manda varios carta pa gobierno. Nan a haci algun cos si, pero te dia di awe nan no a acerca nos. Nos ta mas cu 30 aña miembro di AHATA, pero ningun hende a bati na nos porta y bisa “con nos por yuda bo.”
Con hopi mas forsa tin pa soporta e problema
E forsa t’ey, Jurgen van Schaijk a bisa. Y no tin otro cos pa haci cu sigui lucha. “Esaki mi tin cu haci pasobra si no, mi por gewoon cera mi portanan. Si esaki no yega na un solucion, mi ta cera mi portanan. No ta algo cu mi kier of no kier. No tin otro opcion. Pero mientrastanto mi tin cu sigui cu e lucha.”
Limita of evita cu camber di hotel nobo ta bay riba e mesun conexion ta loke cu nan ta pidi den e caso aki. E ta basicamente mesun cos cu e conseho interno di DOW. Nan mes a bisa pa limita e cantidad di conexion riba riolering pasobra esaki ta bay fo’i man. Cada biaha mas permiso ta sali y ningun hende ta worry cu nada mas.
E ta haya cu e abogadonan di gobierno no ta habri pa yega na un areglo. Tabatin varios demanda, pero hues a puntra nan kico ta nan contesta riba demandanan. Nan no tabatin ningun contesta. Nan a papia yen di cos, esaki no por, esaki no por, etc. y “nos a mustra nan no awo so sino den pasado tambe, e solucionnan. Nan excuus semper lo ta cu no tin placa, no por, mi no kier. Na final di dia esey t’e problema. Nan ta pensa den problema so y nos ta pensa den solucion.”
Un compania cu por tin solucion cu por yuda
Nan tin varios solucion y un di e solucionnan e hotel a busca na e mesun compania cu ta entrega productonan na DOW. E compania aki tin un solucion cu ekipo, esta pa pone mas zuurstof den e sistema, loke e sistema mester. Nan tin un solucion cu yama Bio-augmentation pa mehora e sistema. Tur e solucionnan ta riba mesa. Gobierno no kier wak esey pasobra segun nan e ta costa placa y nan no kier hacie. No tin presupuesto 2024 pa RWZI, pero esey ta e mesun decision di gobierno y di DOW mes, cu nan mes no a pone esey riba begroting. “Aworaki nos ta culpabel pasobra nos kier solucion cu ta costa placa. Asina e no ta funciona.”
Construccion di un planta nobo
E solucion definitivo ta un planta nobo, segun e hotelero. E ta kere cu en berdad e por bin den tres pa cuater aña. “Nos tur na Aruba ta spera esey. Inclusive DOW, gobierno, no tin discusion riba e punto ey. E problema ta entre awe y e planta nobo tin tres pa cuater aña. Mientrastanto mester bin un solucion. Esey no ta bin for di parti di gobierno. P’esey a trece e solucionnan dilanti, tur oportunidad pa mehora e situacion, pa nan wordo obliga door di hues, pa nan sigui e solucionnan. Nan mes no a bin cu ningun solucion dilanti. Dado momento kico mas pa haci, nos ta puntra.”.
