Diaranson 7 di November 2018 a tuma lugar na Universidad di Aruba e tayer di ‘Event Management’. E tayer a wordo duna dor di Randolph Croes y Patrick Verburg, e team dinamico di Elite Productions and Entertainment Aruba.
E tayer aki tawata dirigi pa organisacionnan social cu lo participa den e siguiente edicion di ARUBA DOET. Durante e tayer di Event Management representantenan di diferente Ngo y scolnan a ricibi informacion amplio y tipnan valioso con pa organisa un evento (proyecto) di A te cu Z den un manera efectivo y exitoso.
E team di Elite Productions and Entertainment Aruba a elabora riba e 10 puntonan crucial pa cu un evento (proyecto) exitoso. Esaki ta insera entre otro pa stipula un meta realistico pa evento (proyecto), forma un team, pone un fecha, nombra e evento (proyecto), crea e plan maestro, determina e proceso administrativo, busca partnernan, promove e evento (proyecto), traha un presupuesto y na final evalua e evento (proyecto) den su totalidad.
E team di ARUBA DOET kier sigur gradici Randolph Croes y Patrick Verburg di Elite Productions and Entertainment Aruba pa e tremendo tayer, Universidad di Aruba y e team di coordinadornan pa a haci e tayer aki un exitoso. Alaves ta recorda tur scol, club di deporte, organisacion di bario, centro di cuido, grupo di scouting y fundacionnan pa pensa un proyecto creativo, realisabel y atractivo pa nan organisacion social y registra esaki prome cu Diahuebs 20 di December 2018 riba e website di ARUBA DOET, esta www.arubadoet.com
Pa cualkier pregunta of informacion tuma contacto cu e team di ARUBA DOET na 582-7666 of manda un mail na [email protected]
