Pa midi e impacto cu e horcannan di aña pasa a causa pa islanan Caribense ta hopi y pa algun e cifranan turistico ta te hasta devastador. Den un analisis ta mustra cu tres destinacion a wordo seriamente impacta, esta Puerto Rico, US Virgin Island y St. Maarten, cu hunto a perde no menos di 885 mil bishitante for di Merca, den e prome 7 lunanan di aña 2018.
Cuba a perde tambe 121 mil turista for di Merca, debi na e cambionan haci door di Gobierno Mericano. Esaki acumulando na un perdida di 1.6 miyon di bishitante. Sinembargo, otro paisnan den e region a gana 382 mil turista extra for di Merca, cu ta Republica Dominicana, Bahamas y Jamaica, ganando e mayoria.
Ta sugeri cu e region a perde un total di 624 mil bishitante cu por ta un caida di 9.4% den biahenan haci pa un ciudadano Mericano pa Caribe den e periodo aki. Unda nan a bay? Nan lo bin bek? Y con esaki lo impacta destinacionnan den aña 2019? Ta algo cu bale la pena pensa riba dje.
Mester menciona cu Aruba sin duda tambe a goza di e caida di e otro mercadonan Caribense dor di daño grandi laga atras na nan propiedadnan. Cifranan di crecemento di turismo Mericano tambe ta alcansa 7% mescos cu e otro islanan den Caribe. Pero e reto ta pa mantene e nivel di crecemento ey pa otro aña, awor cu e cambernan di hotel di e paisnan afecta, ta habriendo bek.
Tourism Analytics ta un agencia consultativo specialisa den hechonan relaciona na e industria di turismo di Caribe y ta suministra y analisa informacionnan riba e sector turistico Caribense.
