Bo ta buscando trabou? Bo tin mester di un cambio di carera? Bo ta cordialmente invita pa pasa e Job Fair di Aruba Aloe cu lo tuma lugar diasabra awor!
Aruba Aloe ta creciendo nan ta preparando pa e high season na caminda. Pa esaki Aruba Aloe ta buscando Sales Associates. Como Sales Associate bo lo traha den un di e 16 tiendanan di Aruba Aloe y bo lo ta un di e caranan di e tienda.
Bo lo promove y bende nos productonan cu ta wordo traha na Aruba cu 100% Aloe Vera Gel puro cosecha na nan propio campo di Aloe na Hato.
E persona ideal pa e trabou aki ta un persona cu tin lo siguiente:
- Mester ta creativo, pasiona cu Aruba y nan productonan y cu por traha den equipo;
- Mester tin capacidad pa crea interaccion cu cliente, capacidad pa destaca y demostra nos productonan activamente;
- Mester tin capacidad pa siña tur cos tocante nos productonan y aplica esaki den su trabou diario;
- Experiencia den ‘retail’ ta un plus, experiencia den ‘customer service’, bellesa y cosmetica;
- Mester por traha orarionan flexibel, incluiendo diadomingo y dianan di fiesta;
- Mester tin minimo un VMBO of MBO diploma (associate degree).
E job fair aki tin como meta pa Aruba Aloe haña Sales Associates nobo. Locual ta hasi e job fair aki interesante ta e hecho cu sollicitantenan lo haña sa riba diasabra mes (pendiente di referencia), promer cu final di dia, si nan ta wordo tuma. Importante ta pa tur sollicitante cu kier bishita Aruba Aloe su job fair bin cu un CV actual y un ID valido. Esaki por ta ID, passpoort of rijbewijs. Aruba Aloe ta invita tur esnan cu ta interesa pa pasa diasabra awor na Aruba Aloe situa na Pitastraat 115. Orario di e job fair aki lo ta di 9or di mainta pa 12or di merdia.
Pa mas informacion por manda un email na [email protected] of tambe por yama Ghislaine Croes of Angelique Luydens na 5883222. Aruba Aloe, cual a wordo estableci na 1890, ta un di e poco compañianan di Aloe na mundo cu ta crese, cosecha y procesa su Aloe na e mesun lugar. E Aloe, cual ta wordo considera e miho Aloe di mundo, ta e base di un coleccion di producto pa cuido pa cuero, solo y cabey, cual constantemente ta creciendo. Aruba Aloe awor aki tin 16 tienda aki na Aruba, y su productonan ta obtenibel pa wordo cumpra riba www.arubaaloe.com (Merca & Canada) y na www.arubaaloe.nl (Europa).
