Gymnastiek (gimnastic) ta un deporte cu sigur den e ultimo temponan a cuminsa lanta cabes. Tin varios centro di gymnastiek a lanta sigur den e ultimo dos añanan. Sigur un deporte cu tin un futuro prometedor, pa esunnan cu ta practica e deporte aki.
Na varios ocasion tabata tin delegacion di gymnastiek cu a bay competi afo y ta gana hopi premio den exterior, den representacion di nan dushi isla Aruba. Recientemente tabata Perla Gymanstics cu a sali pa un competencia di gymanstiek den exterior. Nan a bay competi den e Copa IGA Panama 2022. Nan a biaha c’un delegacion di mas o menos 20 persona. Y un biaha mas Aruba su nomber a resona na momento cu e representantenan di Aruba a sali vencedor y ganado di varios medaya. Dialuna e delegacion di Perla Gymnastics a regresa nos isla bek, cu varios medaya.
Miguel Arrebola, representante di Perla Gymnastics a bisa cu e tabata un competencia hopi interesante, cu participacion di diestres pais, 21 club y mas di 600 mucha a participa. Competencia despues di pandemia, ta uno hopi streng. Tin asina hopi atleta cu ta bay pa oro, pero Aruba a logra di bay cu oro, den beginners, level 1, 2 y 3.
Pa loke t’e nivel, e seleccion di Peru a gana campeon nacional di Peru, tambe Trinidad y Tobago tambe nan nivel tabata hopi halto. IGA mes tabata tin hopi mucha cu a participa. Tabata tin asina hopi nivel, cual a hacie hopi dificil di asina hopi mucha. Pero esaki tabata algo cu a premira y a bay prepara esaki.
Un danki special n’e mayornan, cu ta esunnan cu ta trece e muchanan training, apoya nan yiunan, danki na e coachnan cu a haci un tremendo papel tambe den e preparacion di e muchanan den e ultimo seis lunanan.
Proximamente e atletanan di Perla Gymanstics tin un otro compromiso den exterior, pa cual e preparacionnan pa cu esaki ta continua.
Sigur di parti di Headlines Group, cas editorial di 24ora.com y TREMPAN ta manda palabra di felicitacion n’e atletanan pa nan logro.
