E suspension di e director di departamento di Meteo tin atencion tambe di parlamento. Ta trata di un profesional, drs. Marck Oduber, cu a wordo manda cas obligatoriamente, pendiente cierto desaroyonan cu ta tumando luga na Meteo.

Parlamentario Arthur Dowers, a conta un tiki kico ta reaccion di e fraccion. Nan a tuma nota di e situacion aki y kier reacciona como fraccion di AVP.

El a comenta cu a tuma nota berdad di un situacion caminda cu un director mas, pasobra ta hopi director y hefe di departamento a wordo manda cas. Tin di compronde y ta buscando informacion cu hasta na labor a core cu un director, of en todo caso Hoofd van Dienst. Loke a sorpresa nan di parti di Meteo, cu a tende aki cu e minister a manda un director obligatoriamente cu vakantie.

Pa cuminsa, e director aki ta trahando pa casi 8 aña y e director aki ta uno cu a traha cu mas minister. A traha cu minister di e mesun gobierno aki y ta straño cu e gobierno aki a bisa cu diripente a bisa cu e no ta bon.

Ta manda un director cas obligatoriamente cu vakantie, siendo cu e no a pidi. E minister no ta conciente cu ta tratando enpugna contra e LMA di a actua di e forma aki, segun e parlamentario.

Por a scucha e minister ta bin afo y ta bisa cu tin un investigacion andando, den e departamento aki y e investigacion aki lo a duna cu e trahadonan no ta contento cu e director. Ta straño, pasobra tin un investigacion ta wordo haci pa DRH, cu a wordo pidi pa e director mes. Ta straño cu ta bay analisa e situacion den e departamento pa mira si tin algun cos pa drecha y cu e prome cos cu nan ta haci ta bula e cabes, na luga di tuma e informacion aki y uze den un forma corecto pa loke ta trata e desaroyo di e departamento.

Parti mas tristo ta, cu segun Dowers, e director aki no a wordo scucha tampoco. Un di e principionan di bon gobernacion ta, hoor en wederhoor. Si en caso bo kier manda un director cas of cu vakantie, mester invite pa scuche y tende su punto di bista y mira ki conclusion ta saca.

No por ta asina cu ta djis yega, hisa benta, manda un director cas y sin cu papia cun’e, sin cu scuch’e, sin cu haci un intento pa si acaso mes tin cualkier discusion of disputa den e departamento, pa traha riba e disputa aki.

E parti mas lamentabel ta, cu bo ta sali tambe pafo como minister y tin di bisa cu Dowers ta decepciona. Pesey a reacciona cu Chris Romero, cu tur a mir’e como un hende hopi decente, cu hustamente e ta sali pafo, difama un director, sin mucho investigacion haci, sin cu duna e director un chens, pa sikiera e defende su mes den e caso aki.

Dowers ta spera cu esaki no lo bay bira e trend di e minister aki, pa loke ta trata e directornan, pasobra ta mira den gobierno pa bula cabes di tur director. Pero a spera di Chris Romero, algo poco diferente. Awo por bisa cu e tambe a uni su mes den e tradicion di MEP di bully, di abusa, di e directornan.

Segun Dowers, den e dianan cu ta bin, lo sali mas informacion pa loke ta trata e caso aki. Ta imposibel pa un director cu a traha, casi 8 aña, sin cu tabata tin problema cun’e. Conoce toch como un profesional, un persona tin su educacion, su formacion riba e tereno aki. No tin ningun problema cun’e. No a tende ningun problema nunca y diripiente ta saca e meneer aki di e forma aki, daña su nomber, mand’e su cas, siendo cu si tin problema den e departamento, e problema mester wordo trata na un forma diferente. Nunca por ta asina, cu ta e director aki so por ta e problema. E minister mester haci un analisis mucho mas profundo paden y ta spera di dje tambe, cu e ta bay recapacita, y hala aden di e vakantie obligatorio cu a duna e director aki. Ta sigur tambe cu ta na su luga, pa e rehabilita e director aki. No por ta posibel cu ta daña nomber di hende, sin sikiera a papia cun’e, sin cu a completa un investigacion drechi.

 

Consehero di minister

Tin hende yega na e ex minister, ta trahando den e departamento aki y ta investigando pa mira si ta hendenan cu e mes a nombra den pasado y cu claro ta scucha e hendenan aki. Esey, si, ta haci e caso mucho mas grave. Lo bay divulga den e dianan cu ta sigui, si berdad esaki ta e caso. Tin indicacion cu e consehero tin hendenan cu e mes a nombra, hendenan yega na dje y por ta esey por hunga un influencia, pero lo bay trata esey den e dianan cu ta sigui, pa no bisa un cos, cu no ta cuadra. No kier bisa algo cu despues a bin resulta cu no ta berdad. Ta un punto cu mester di mas investigacion.