E preocupacion ta grandi y esaki ta bin desde cu e pandemia di Coronavirus a cuminsa. Arte a sufri mas, pasobra casi ningun caminda ta mencion’e. Diana Antonette, docente di scol di baile Diana Antonette, a bisa cu porfin a menciona baile individual den e protocol.
For di comienso a prepara, a cera scol dos luna y mey. Despues a bin ki dia por cuminsa y asina a start na luna di juni. Scol di baile Diana Antonette ta na Cas di Cultura, tin un entrada y salida apart. A introduci e protocol di laba man, hand sanitizer y distanciamento social. Despues di cada les nan ta limpia e luga, habri tur porta, pero awo e grandinan tin di uza tapaboca obligatorio.
Desde cu nan a cuminsa bek na juni, basta alumno no a regresa. Diana Antonette ta duna les di arte tambe na San Nicolas y eynan ta bay mas miho. E tin pensamento cu mayornan tin miedo, pasobra na diferente scol tin mucha- y docentenan contagia. El a sigui bisa cu gastonan ta sigui y tin un debe cu Cas di Cultura cu e no sa ki dia ta bay paga. Dos biaha el a haya loonsubsidie pa su empleadonan y di gobierno el a haya pa empresa un biaha. Esey a yuda un tiki, pero lunanan di juli y augustus tabata cera pa vakantie. E huurnan ta sigui y e ta un problema grandi. Awo Antonette ta purba di haya fondo otro caminda y ta spera di hay’e, pasobra si e situacion sigui asina ta bira dificil.
Pierangely Wever, docente di scol di baile Diana Antonette, semper ta sigui noticia di Hulanda, semper arte y cultura ta hopi halto eynan. Nan a indica di bay pone extra placa pa arte y cultura. Esaki ta pa motibo cu arte y cultura ta pasa den situacion hopi duro cu e crisis aki. E kier sa con a para aki na Aruba pasobra desde comienso di e pandemia no a tende nada. Wever kier sa kico ta bay pasa cu arte y cultura en general, cu artistanan, musico y bailadonan. A laga nan tira un banda y p’esey basta musico ta keha di no tin trabou.
Esaki ta un problema serio, pasobra artistanan ta hende studia pa arte. Tur locual cu mester studia p’e y educa un comunidad, ta un trabou. Esaki ta pasobra nan ta biba 100% y ta algo cu mester paga p’e. Hopi biaha ta haya diferente pregunta pa baila of toca aki aya y ta puntra nan pa hacie pro bono, esta gratis. Creatividad tin un balor, su tempo, su pasion, energia pa por yga na un resultado final.
