Na 1993, Aruba y Hulanda a firma e ‘Protocol ’93’. Un di e palabracionnan tawata cu Aruba lo introduci e ley pa financiamento di partido politico. A tuma Aruba 27 aña pa cumpli cu e palabracion aki! Den e di dos siman di september 2020, parlamento di Aruba a discuti y aproba e ‘Ordenansa Financiamento di Partido Politico’ unanimamente.
Historico
Cu tur rason, nos prome ministro (PM) a aplaudi e paso historico aki. Esaki mester conduci na transparencia den recibo y gasto di placa di campaña di partido politico y politico individual. Esaki mester evita mafioso ‘regala’ e mundo politico asina hopi placa cu nan mester balia manera mafioso ta toca. Si lo tawata sa di antemano cu un criminal Venezolano importante a ‘regala’ e lider di e actual partido di oposicion un suma grandi, por a percura pa menos aceptacion y confiansa den comunidad pa cu e proyecto di Citgo.
Referendum
Pero tin mas desaroyo alentador. Den un conferencia di prensa reciente, PM a sorprende comunidad cu e sugerencia cu “no por exclui cu lo bin cu referendum tocante e pregunta si Aruba mester bay di acuerdo of no cu e condicionnan di Hulanda pa cu su sosten financiero”. Asina e ta duna muestra di un gran sentido di realismo. Su aparente disponiblidad inicial pa firma ‘e acuerdo’ cu Hulanda a haya resistencia pisa di esnan paden y pafo di su propio partido cu cueste loke cueste kier evita cualke infraccion riba NAN ‘autonomia’. P’esey ta un paso gigantesco pa dilanti si di berdad lo envolvi pueblo di Aruba, pa medio di un referendum of otro ‘instrumento’ mas apropia, concretamente den e decision final cu ta di gran importancia pa su sobrevivencia. Pasobra den practica a resulta for di hopi tempo caba cu e interesnan di ‘politica’ y di ‘comunidad’ ta hopi leu for di otro.
Cambio di rumbo
Pero no mester limita transparencia y participacion na e temanan menciona. E ‘aparente democracia’ tradicional den cual partido politico, unabes na poder, sa legitima tur nan actonan referiendo na e resultado di eleccion, mester caba. E intencion pa duna comunidad participacion den un decision importante cu tin consecuencia pa henter comunidad, ta nifica un cambio di rumbo drastico. Esaki ta pone fin na e custumber politico di ‘regla’ decision importante den secresia cu esnan cu interes (financiero) grandi.
Un pilar economico nobo
Esaki ta conta sigur tambe pa e ‘pilar economico nobo’ cu mester haci Aruba menos dependiente di e industria turistico. Segun PM tin basta inversionista cu a mustra interes desde cu a habri e posibilidad pa oferta pa e tereno gigantesco di e refineria. Tanto pa sigui cu refinamento di crudo como pa empresa totalmente diferente. Pero…cu excepcion di un grupito chikito di experto (?) cu mester selecta for di e tantisimo (?) posibilidadnan esun mas realista y confiabel y cu mas perspectiva pa Aruba, ningun otro hende tin algun nocion. Pueblo por spera so cu lo no ripiti e mesun ‘eror’ manera cu Citgo, cu a frustra desaroyo di San Nicolas y Aruba pa hopi aña.
Toma di decision colectivo
P’esey ta di gran importancia pa gobierno envolvi comunidad despues di e prome seleccion activamente den e decision final. Por ehempel: ¿nos lo sigui cu e industria petrolero cu no solamente tin riesgo grandi di contaminacion serio pero tambe, riba nivel mundial, ta den receso? ¿Of nos lo scoge pa tecnologia innovativo cu por tin varios efecto positivo pa Aruba? Mester duna transparencia na tanto gremio comercial y sindical como NGO’s al caso y otro ‘interesado’ en cuanto e posibilidad- y peligronan di cada alternativa y duna nan participacion den e toma di decision final. Esey lo reduci e posibilidad di tuma decision a base di soborno/finders’fee cu aparentemente a yega di hunga un papel importante den e toma di decision politico partidista. Si gobierno kier merece credibilidad y no crea e impresion di ta duna solamente ‘servicio di lip’ na transparencia y participacion, e ta envolvi e partnernan social menciona sin tarda den e analisis secundario. Ademas, si ta posibel, e lo duna pueblo di Aruba participacion den e escogencia importante aki pa su futuro. P’esey no tanto un referendum, sino mas bien un ‘panel di ciudadano’ ta e instrumento mas apropia na e momento aki.
