Cu solamente 21 aña, Diandra Maduro ta sufriendo di e malesa Lupus (SLE) y despues di un luna cu a diagnostik’e, el a bira paralitico, afectando mas di mita di su curpa. Actualmente Diandra mester di atencion medico mas pronto posibel y cual mayoria, ta riba su mesun costo.
Pa e motibo aki mes comision di trahado di Sasaki & Tanki Leendert Service Station lo ta parando na diferente rotonde dia 23 di november pa asina recauda fondo pa nan colega Diandra, por bay busca su salud na Hulanda.
Ya caba den luna di october tabata tin benta di snackbox, cual tabata un exito riba su mes. Awo, boluntarionan lo tey for di 10’or di mainta pa 4’or di atardi, na e diferente rotondenan rond di nos isla, pa asina recauda fondo pa asina logra e meta pa Diandra por busca su salud na madre patria.
Cu cada florin cu bo aporta, bo ta yuda Diandra yega mas cerca di su meta. Union ta haci forsa. Ban yuda un yiu di tera busca su salud.
Alabes ta haci un apelacion na tur automobilista, pa tene cuenta cu e boluntarionan cu lo ta riba caminda riba e dia aki.
Di parti di e comision di boluntario, ta gradici un y tur cu yuda cu kico cu nan por duna, pa asina yega na e meta final.
#DIANDRALUPUSJOURNEY
