Un rato pasa, e homber Santo, Sinterklaas a yega Aruba hunto cu su Pietnan na Harbour Arena, den presencia di miles di mucha hunto cu nan mayornan.
Por mira e cara di alegria di e muchanan, ora cu nan a wak Sinterklaas baha for di boto cu a bin for di Spaña. Naturalmente nan sa cu nan a haci bon mucha y e mala muchanan, e Pietnan tey pa hinca nan den saco y hibanan Spaña, sperando cu pa otro aña nan comporta nan mes.
Sinterklaas a baha na pier na APA, caminda Harbour Arena ta situa y ta sigui un programa basta extenso cu ta dura te den oranan di merdia pa atardi, cuminsando cu e parada di custumber, cu lo pasa riba LG Smith Boulevard y cu lo termina na Plaza Betico Croes.
Mientras tanto, pa esnan cu no ta compaña Sinterklaas den su “intocht”, tin un programa for di tempran riba Plaza, caminda cu tin standnan di cuminda y tambe actividad pa e muchanan, wardando e binida di Sinterklaas.
Ken ta Sinterklaas
Sinterklaas ta hunga e rol principal den e fiesta di Sinterklaas, cu ta tuma luga den Reino Hulandes tur aña riba dia 5 di december. Mester menciona cu e mesun celebracion ta tuma luga na Belgica tambe riba dia 6 di december. Ta basa e storia di Sinterklaas riba e Obispo Nicolaas van Myra, cu tabata biba den di tres siglo despues di Cristo na Klein Azie. E personahe “Sinterklaas” ta un homber bieu cu cabey y barba blanco, bisti semper cu un mijter y mantel color cora. E ta move riba un cabay color blanco y semper tin un of mas ayudante, cu nos ta yama Piet.
Ta pensa cu e forma moderno di celebra Sinterklaas awendia ta procedente for di e “prentenboekje” titula Sint Nikolaas en zijn knecht, skirbi na aña 1850 door di e docente Jan Schenkman (1806-1863), aunke cu e fiesta mes tin un pasado hopi bieu. Den varios otro pais na Europa ta celebra Sint-Nicolaasdag, pero e folklore di cada pais y area ta diferencia hopi. Varios leyenda tin e mesun contenido, esta cu Sinterklaas tabata e santo defensor di muchanan. Hecho ta cu e figura di Sinterklaas a trancede varios siglo y a evoluciona di un defensor santo di muchanan, pa un boeman y finalmente pa un amigo di tur mucha.
Ta obvio cu e tradicion bieu cu geograficamente Sinterklaas ta procedente di Klein Azie of Italia a cambia cu tempo y a bira Spaña. Dicon e cambio ainda ta desconoci. Den canticanan bieu nunca tabata canta cu Sinterklaas ta procedente di Spaña, sino cu e ta biaha pa eynan pa busca cos dushi. Generalmente ta sali for di e punto di bista cu ta e docente Jan Schenkman tabata e prome cu a trece Sinterklaas for di Spaña. Di acuerdo cu su storia, Sinterklaas tabata e “Obispo di Spaña”.
E mesun autor aki a introduci e ora tambe e ayudante, cu despues a haya e nomber di “Zwarte Piet”. Tambe el a introduci e “stoomboot” den cual Sinterklaas tabata biaha pa Hulanda. Te dia di awe ainda Sinterklaas semper ta yega Hulanda y islanan den Caribe Hulandes via lama. Ta den e buki di aña 1850 caba a aparece e frase cu despues a bira un di e canticanan mas popular di e celebracion, esta “Zie, ginds komt de stoomboot/ Uit Spanje weer aan!”.
Na inicio di siglo 20 ainda tabatin un diferencia den e forma di celebracion di e fiesta di Sinterklaas na Hulanda, pues den ciudadnan grandi tabata diferente cu riba “platteland”. Pero bou influencia di enseñansa y despues e comercialisacion y sin lubida surgimento di “massamedia”, cu a bin un standarisacion di e fiesta aki. E anochi di sorpresa, cu habrimento di regalo, compaña cu cartanan di Sinterklaas cu recordatorio pa haci “bon mucha”, ta fenomenonan relativamente nobo den e tradicion.
Un encuesta na aña 1943 ainda tabata referi na e fenomenonan aki como “sporadico”. Mientrastanto aki na Aruba, tin dos dia hopi importante den e celebracion, esta e dia di yegada di Sinterklaas y anochi di “pakjesavond” dia 5 di december cu muchanan ta haya regalo. Banda di esey, tin e tres simannan cu generalmente mayoria mucha ta “bon mucha” na cas.
