Asina cu fin di siman yega, Polisnan tin man yen di establecimentonan cu pa un motibo of otro no ta tene nan mes na e regla temporal di orario pa cera negoshi. Ayera nochi Bohemian Bar & Restaurant no a cera na e ora stipula di gobierno cu ta 11:00pm, pa cual motibo Polis patruyando den e area y a tuma nota cu tabatin ambiente hasta despues di e ora stipula.
Di biaha a baha na e restaurant y bar pa hala atencion di e gerente y a orden’e pa cera mesora. A cord’e riba e regla stipula, cu 11:00PM tur negoshi mester ta cera. A pidi tur presente pa bandona e sitio y di biaha a duna e doño di restaurant un boet pa no cumpli cu e regla.
Negoshinan hopi biaha ta keha cu, den e normal nobo, clientenan tin e tendencia pa toch yega laat pa come of bebe algo. Tempo ta pasa lihe y 11:00pm ta eynan mes. Consecuentemente ora avisa clientenan cu e negoshi ta bay cera, nan bo ta move y asina ta hinca e restaurant den problema. Locual por of mester haci ta, foe si 10:30pm manda e “last round” y cende tur luz pa indica e intencion di cera pa 10:45pm pasobra pa 11:00pm e negoshi mester ta completamente cera y tur cliente mester ta pafo.
Mester menciona cu ta varios restaurant y bar a ricibi bishita ayera nochi di e defensornan di ley, sea pa corda nan pa cera na ora of pa descubri cu ainda tabatin cliente scondi paden despues di e orario stipula. Polis por ehempel a topa cu un bar yen di hende den Klipstraat rond di 11:45pm. No ta conoci si eynan tambe a parti multa. E bartender a pensa cu si e cera e porta pafo, cu Polis lo no ripara cu tin ambiente paden siendo cu tin decenas di auto para tur rond eyfo.
Di acuerdo cu maneho di Ministerio Publico, boetnan asina pa viola orario di cera negoshi ta cuminsa na 1000 florin y por bay te cu 10 mil florin dependiendo di cuanto biaha ta viola e mesun ley tras di otro.
