Team y e clientenan di Pasadia Briyo di Solo kier a gradici tur persona cu di un of otro manera a duna nan aporte pa asina por a realisa otro proyecto cu ta e renobacion di nan snoezelruimte. Scol kier gradici Jorge Rosel di Notorious Design pa e tremendo arte di airbrush.
Pasadia Briyo di Solo tin capacidad pa 60 cliente adulto cu deficiencia intelectual cu ta bishita e Pasadia tur dia. Na Pasadia Briyo di Solo tin 5 grupo di 12 cliente, unda ta ofrece nan actividadnan pa nan desaroyo intelectual, pa nan por bira mas independiente posibel y/of mantene loke nan a siña caba.
E snoezelruimte ta un parti di e programa cu Pasadia Briyo di Solo ta brinda na su clientenan. Ta uza e snoezelruimte cu dos meta. Prome meta ta pa stimula e cuater sentidonan mas importante di e clientenan pe; Oido, visual, holo, sinti (voelen). Di dos meta di e snoezelruimte ta pa relaha y/of baha e estimulo nan di e cuater sentidonan aki.
● sentido di oido nos ta stimula cu e sistema nobo di Smart device Alexa cu ta produci zonidonan di bestia, ola di lama, awa ta yobe. E sistema aki ta produci Delta Wave cu ta yuda e clientenan relaha den snoezelruimte.
● Sentido di visual, e sistema di luz ta manda efecto di luz cu diferente forma y colo, a pinta e snoezelruimte cu airbrush cu diferente pintura bou di lama y esaki ta refleha cu e sistema di luz. Mientras cu e cliente ta disfruta y relaha su mes riba e efectonan di luz.
● Sentido di holo, clientenan ta ricibi aromaterapia cu e difuser machine cu diferente aroma.
● Sentido di sinti (voelen), tin un baki yena cu bala caminda e clientenan ta drenta den e baki. Nan ta drumi y sinti e balanan rond di nan curpa. Tambe tin un cama di awa y cama di aire cu e clientenan por drumi ariba y relaha nan mes.
Pasadia Briyo di Solo kier gradici un biaha mas tur cu a haci donacion na e pasadia na aña 2017 na momento cu e tres gruponan a kima. A pesar di a drecha e tres gruponan aki completamente bek a logra diferente otro proyecto di renobacion na e Pasadia y e snoezelruimte ta un di nan.
