Recientemente Aruba a firma un acuerdo bilateral (MoU) cu Reino Uni di Gran Britania y noord Irlanda. Directie Luchtvaart Aruba y e autoridad di aviacion civil di Reino Unido a firma dicho acuerdo bilateral. Aki ta trata di un MoU relaciona cu transporte aereo cu ta regula derechonan ditransporte aereo di e aerolineanan di ambos pais riba e rutanan entre ambos pais.
E acuerdo ta segun e principionan di “open skies”, cu ta un maneho liberal sin restriccion y limitacion pa loke ta capacidad y frecuencia di vuelonan. E maneho aki ta esun di mas efectivo pa maximalisa airlift, cual ta hopi importante pa turismo di Aruba. Tambe ta importante pa remarca cu e acuerdo firma ta habri porta pa vuelonan directo entre Aruba y Reino Uni, di cual dia 26 di maart 2023, British Airways lo efectua su prome vuelo entre London Gatwick y Aruba.
Siguientemente Aruba lo sigui e proceso cu e autoridadnan di Reino Uni pa converti e acuerdo aki den un tratado. E acuerdo aki ta forma parti di e strategia di Ministerio di Transporte pa sigui expande e infrastructura di Aruba, di acuerdonan bilateral di transporte aereo, pa asina crea mas posibilidad pa airlift y conexion, cu di su parti lo genera y stimula desaroyo economico.
