Awe diadomingo 1:00pm, a entrevista Minister di Husticia, mr. Andin Bikker, dilanti edificio di Conseho di Minister. Ey el a divulga cu Polis a informe diadomingo mainta cu entretanto mama di e mucha cu a fayece (5 aña) y esun perdi (3 aña), cu na un principio tabata haci uzo di derecho di no papia nada, awor porfin a cuminsa coopera y duna informacion valioso na e ekipo investigativo.
Manera ta conoci, diaranson ultimo a yega un mucha homber di 5 aña na Hospital, cu multiple fraccionnan, lesionnan y kemaduranan na su curpa. Su condicion tabata serio y a empeora den e oranan cu a sigui te cu el a fayece diabierna. Basa riba e declaracion di e mama, cu a bisa cu e yiu a cay den speeltuin, no tabata cuadra cu e lesionnan serio cu e criatura a sufri. Polis a detene e mama y e Padrastro diabierna mes, sospecha cu nan sa mas di e caso aki. A resulta e ora cu nan tin un yiu mas, di apenas 3 aña di edad, cu niun hende no sa su paradero. Diasabra, basa riba declaracionnan, a bay over na detene e wela tambe, pues e mama di e mama, bou e mesun tipo di sospecho.
A start un buskeda diasabra caba, conduci pa Polis y cu sosten di Mariniernan. A bishita areanan di interes, specialmente pariba di brug. A concentra por ehempel banda di unda e mucha tabata biba of tabata keda. Lamentablemente no a haya e mucha perdi, locual si a topa cune, ta un otro mucha di e mesun famia cu tambe tabata perdi. A haye na un Bisawela y a percura pa e ta bon protehi y cuida.
“Nos tin un team grandi buscando y mi tin confiansa cu nos lo haya e mucha”, asina Minister Andin Bikker a bisa. Si el a pidi comprension di e boluntarionan, pa tene cuenta cu Polisnan tambe ta conduciendo un investigacion penal relaciona cu e mucha cu a muri. Esey ta canando paralelo cu buskeda di e ruman perdi. E condicionnan bou cual e mucha a somenta, ta preocupante y cada ora cu pasa ta pone mas presion pa logra hay’e urgente.
Ya caba tabatin comunicacion entre e lidernan di e gruponan buscando, hunto cu e ekipo investigativo, pa sigura cu esun no ta stroba trabou di e otro.
Ta accentua cu tur informacion ta yuda na e momento aki, pues pueblo por yuda soluciona e caso si nan yama duna tip. Ya caba bastante informacion ta drentando, loke sigur ta yudando cera e puzzel.
