E amantenan di idioma y cultura Frances, manera Carl Rijsdijk (Presidente di Alliance Française Aruba) a describi esaki, a topa dia 14 di juli. Un fecha riba cual nan ta recorda nacemento di e republica di Francia.
Frances, of amantenan di e idioma y cultura Frances, ta celebra e fecha aki mescos cu ta e caso na Aruba tambe. E grupo a bini diadomingo ultimo hunto cu e directiva di Alliance Française Aruba pa celebra e fecha special.
E organisacion a keda funda 40 aña pasa, segun e secretario Erin Vinck. Un tempo nan a yega na casi 70 miembro, pero ora cu e pilarnan di e organisacion a bay descansa, e miembresia a baha y a yega te na 25 persona. Sinembargo den ultimo añanan a mira un crecemento pa cual nan ta hopi contento, segun Vinck a bisa e anochi di e celebracion.
Alliance Française Aruba ta promove e uzo di idioma Frances y e cultura. Ta lamentabel si, el a bisa, cu awendia solamente VWO ta duna idioma Frances como les pa cual recientemente tabatin entrega di diploma. Pa promove e uzo continuo di Frances, riba e prome diasabra di luna nan ta organisa Cafe Française, segun e Presidente Carl Rijsdijk a conta. Na e momento aki no ta dunando les di Frances, pero si tin pensa di busca un docente pa cuminsa cu un curso atrobe.
Bastille Day of quatorze juillet, ta e fecha mas special pa Francia, consul honorario di Francia na Aruba Christian Monguellaz, a conta. E ta e fecha riba cual e pueblo Frances a lanta contra Rey Luis XVI y cu e Republica di Francia a keda institui na 1789. E pueblo ta celebr’e manera un Dia di Famia, mescos cu 4th of July. Monguellaz, kende ta den e puesto aki desde 2001, a conta cu tin apenas 31 Frances bibando na Aruba, y casi tur trahando den sector di Horeca.
Esnan interesa pa forma parti di e organisacion por contact un di e miembronan.
