Despues di un temporada un poco fastioso p’e clientenan di Hulp Bestuurskantoor (HBK) San Nicolas, a logra habri’e bek pa brinda servicio na comunidad pariba di brug. HBK a habri den un localidad temporal di Refineria di Aruba (RdA).
Segun parlamentario Alvin Molina di fraccion di MEP, ta comprendibel cu na luna di oktober 2022 a cera e edificio bieu, pa motibo cu unda e tabata ubica, no tabata adecua mas. No tabata saludabel pa esunnan cu ta traha eynan y tampoco p’e clientenan door cu tabatin schimmel. Di otro banda si e doño di e edificio a percura pa mantencion, kisas e situacion no mester a yega asina leu.
Molina: “San Nicolas mester a haya su mesun MFA algun aña atras caba. Un di e prome districtonan cu mester a haya MFA, pero lamentablemente San Nicolas a keda afo. E plan cu a presenta ta cu e edificio unda HBK tabata situa, ta remodela, pa ubica mas departamento aden e.o., Sociale Zaken, Dimas, AZV y Enseñansa pa Empleo. Sigur mi ta gradici nos Minister President Evelyn Wever-Croes y director di Censo, Sharline Luidens y su ekipo pa den un temporada relativamente corto, e servicio por a brinda bek na pueblo di San Nicolas y bisindario. Manera boso por wak, mi tambe a logra haya mi papel di 5 florin. Nos ta keda pendiente pa e desaroyonan pa cu MFA San Nicolas.”
