Diadomingo anochi a sosode un accidente den trafico, caminda cu persona a perde su bida. E homber Altair Brelaz, di 54 aña a bira e di cuater victima mortal di Aruba su trafico.
E anochi aki a nota presencia di Altocomisario drs. Ramon Arnhem, cu a indica cu ta un lastima cu trafico insigur riba nos isla ta cobra bida di un otro ciudadano.
Segun Arnhem, cada victima ta uno di mas y e cabayero aki tabata crusando caminda y un auto ta pasa dal e. E chauffeur tambe a keda aresta y e investigacion ta continua. “Pero mi ta preocupa cu tin asina tanto victima den trafico,” el a expresa.
Y tambe tin un cierto grado di iresponsabilidad, of tin biaha alcohol, of otro circunstancianan envolvi cu en realidad tin un efecto mas grave ainda. Pero, investigacion lo mester trece claridad, pa haya sa kico exactamente tabata e causa di e accidente fatal aki. Pero e echo cu ta dal un persona cu auto asina aki, sigur ta algo grave bou di cualkier circunstancia, pa tur hende. Y pa nos isla, un accidente fatal sigur ta algo teribel. “Nos kier un isla safe.”
Arnhem a sigui bisa cu e no kiermen cu esey no ta e caso actualmente, pero cada victima ta uno di mas. Tur biaha cu tin un victima, e ta uno di mas. Cuerpo Policial lo haci tur loke ta posibel pa implementa mas prevencion y crea mas consciencia entre e poblacion, pa paga tino ora ta core auto y paga tino con ta core auto.
Esey, como comunidad mester tuma responsabilidad p’e y tambe como sociedad. Tambe pa garantisa siguridad riba caminda hunto.
