Awe mainta Warda di Polis na San Nicolas a bay den alerta pa un preso cu posiblemente tin malesa contagioso. Aunke cu Cuerpo Policial a tuma tur accion di siguridad y di prevencion necesario, toch el a crea un situacion di preocupacion y panico bou di e Polisnan trahando eynan. Ta trata aki di un di e presonan deteni den e caso grandi di droga abordo di e barco Aressa, cu diamars ultimo a detene y ta encarcela den cel na Warda di Polis San Nicolas. Mayoria di e 11 sospechosonan ta cera na Warda di Polis di San Nicolas.
E sospechoso ta tosa y ta saca sanger, pa cual ta sospecha cu e lo por ta contagia cu Tuberculosis, un enfermedad cu ta masha contagioso. Ainda no a confirma cu esey ta e caso, pero un Dokter a samin’e, a hib’e IMSan y a haci algun test na Hospital, pa cual awor ta wardando riba resultado. E proceso pa transport’e for di IMSan na San Nicolaas pa Hospital na Eagle a bay compaña cu escolta di Polis dilanti y patras di e Ambulance.
Testigonan a conta 24ora.com di a mira Polisnan ta mobolisa den auto cu zwaailicht y sirene pero cu mask dilanti nan boca. Hopi a pensa cu si por ta algo cu tin di haber cu Coronavirus, pero investigacion cu nos a haci ta mustra cu mas bien ta preveni pa contagia cu TBC.
E sospechoso ta di nacionalidad Rusiano pero ta procedente di Medio Oriente, di Montenegro. E barco a sali for di Surnam, a pasa Venezuela y lo a sigui pa Grecia. Di acuerdo cu investigacion haci pa 24ora.com, despues cu e barco a sali for di Venezuela, algun boto “Go-Fast” carga a yega y mara den banda di e barco y asina e “load” e cargamento di droga abordo.
Pero den e proceso, e criminalnan no a conta cu Warda Costa di Caribe Hulandes, caminda e grupo di Aruba a sali mesora, a para e barco, a subi abordo, a descubri e cargamento y a detene tur hende riba e barco, incluyendo e capitan. A bin cu e barco waf y asina a encarcela tur tripulante.
Si acaso confirma cu e sospechoso ta sufri di e malesa TBC of cualkier otro malesa contagioso, cu esaki lo bira un caso masha complica pa tur cu a traha cerca di e caso of di e detenidonan. Ta diferente Polis, Warda Costa, Marina Real y otronan tabatin contacto cu e sospechosonan, tanto prome como despues cu a encacerla nan na Warda di Polis di San Nicolas. Entretanto Mando Policial a laga tuma e medidanan di preocacion necesario na Warda di Polis San Nicolas, pa evita cu ta contagia e Polisnan trahando. E sospechoso lo tin algun dia mas pa keda eynan, prome cu e yega su 10 dianan pa e bay KIA, si acaso esey ta necesario.
Na e momento aki e sospechoso ta interna na Hospital den un camber isola bou proteccion y supervison di Polis, cu ta sinta na porta di su camber durante 24 ora pa dia, pa evita cu e ta huy of tin contacto cu cualkier otro persona cu no ta nurse of Dokter di Hospital.
