Miembro di parlamento Alan Howell di e fraccion di POR ta convenci cu e decision di Ricardo Croes di RED pa bandona sala y keda sin vota pa e mocion di desconfiansa contra minister Marisol Lopez-Tromp ta causa problema den coalicion. “Eigenlijk mi mester ta hopi sincero, mi ta bisa e cos manera cu e ta, tur hende por mira cu e ambiente den coalicion, riba su mes, no ta de lo mejor“, asina e Vice-Presidente di Parlamento ta mira e situacion cu a presenta awo den coalicion MEP-POR-RED.
Asina mes, di otro banda, e mesun parlamentario ta haya si cu Ricardo Croes tin e derecho democratico di vota pro, contra of bandona e sala. E hecho cu el a bandona sala awe ta su derecho constitucional con e ta vota of comporta den parlamento.
Ricardo Croes a bisa den su conferencia di prensa cu e reunion como tal tabata ilegal pasobra no tabatin qourum. Riba esey e vice-presidente di parlamento a contesta cu tin un acuerdo interno riba e asunto aki y tur 21 parlamentario, incluyendo e mesun Ricardo Croes a bay di acuerdo cu e areglo aki. Pues pa Alan Howell, e reunion tabata legal y e mocion pasa ta vigente. E hecho cu no tabatin 11 miembro den sala no kiermen nada.
Nos a puntr’e cu si acaso tabatin 5 miembro so den sala, di e 21 miembronan, cu si nan a vota tambe lo tabata legal. E parlamentario a contesta cu “si”.
