Lider di fraccion di RED, Ricardo Croes tabata un di e parlamentarionan cu a sali for di sala di Parlamento, na momento cu fraccion di MEP a presenta un mocion di desconfiansa contra di minister di Infrastructura, Marisol Lopez-Tromp.
Den un rueda di prensa e ta conta cu e ta sumamente desapunta pa realisa cu tabata tin un reunion contra di e reglamento di orden di Parlamento cu ta exigi pa por tin un minimo di 11 pa cualkier reunion por tuma luga. Croes a bandona Parlamento, el a bandona e edificio. El a pone presidente di Parlamento na altura cu e no ta participa den e weganan aki cu nan kier hunga.
E reunion aki yama pa trata e problematica di piscadonan, ningun momento tabata pa trata desconfiansa den ningun minister.
Croes ta condena e actitud aki den un organo asina importante manera Parlamento di Aruba. Croes a presenta un mocion y e mocion ta pa por atende cu e piscadonan. Tin gedoogbeleid, ehecut’e te ora cu locual ayera den ministerraad a keda acorda entre tur minister, incluyendo e minister di medio ambiente.
No mester di ningun mocion di desconfiansa pa nada. Esaki ta un desapunto grandi cu Croes tin.
Problema den coalicion?
Hopi hende tin gana di pensa cu cualkier problema cu tin, Croes mester bandona gobierno. Manda gobierno cas. Cada rato cu tende un situacion, manda gobierno cas. Croes a splica cu e posicion di ta un Parlamentario ta un trabao pa respeta.
E ta e organo di mas grandi den e pais aki. No ta un cos di hunga cun’e. Benta e gobierno abao na beneficio di ken, e parlamentario ta cuestiona. Ricardo Croes no ta e sorto di mucha manda cu ta hunga e sorto di weganan aki.
Un reunion ilegal
Croes a scucha cu tabata tin votamento paden. P’e e reunion aki a ilegal. Pa e reunion ey por ta valido, e mester ta sinta eyden, caminda cu tin 11 persona presente pa atende e reunion di Parlamento.
Fraccion di AVP a bandona Parlamento, mescos fraccion di RED. Presidente di Parlamento, Ady Thijsen mester conta cabes y realisa cu e reunion a caba a eynan.
E tema di spearfishing
Croes a bay ampliamente riba nos cultura, riba nos tradicionnan. Pero tambe riba e hecho cu gobierno a bin ta tuma mucho aña den beslag pa bay om cu e situacion aki.
Y no ta asina tampoco cu tin un gedoogbeleid. Pakico para un cos completamente, specialmente awor aki den COVID-19, caminda cu tur hende sa cu hamber a bati na hopi porta, ta pakete di cuminda ta entrega na cas di hende y cu no tin un regulacion drechi pa controla.
Hende ta subi boto bay cu nan harpoen, tira pisca pafo di 50 meter stipula. Bin bek, drenta e 50 meter, kita pisca y boto for di nan. E cosnan aki ta inaceptabel. Pesey a entrega un mocion caminda cu pa awe p’adilanti ehecuta e gedoogbeleid bieu, laga tur hende bay haci loke nan tin pa haci. A pidi un luna mas, asina ta duna pueblo e un luna ey.
Laga e hendenan bay tira nan pisca, mientras cu ta bin cu nan formulario, etc. cu kier haci cu ta aproba den ministerraad. RED ta sostene esey. RED no ta sostene ta e wega politico di yama un reunion pa atende cu problema di piscado y presenta un mocion di desconfiansa. Esey ta bisa Croes cu esey tabata e intencion for di prome caba.
