Alan Howell, Parlamentario di POR a comenta riba e desaroyo y conclusion di e reunion publico di Parlamento cu a tuma lugar diamars unda Minister Otmar Oduber tabata presente pa duna informacion riba e situacion di Green Corridor y puntra nan opinion riba e siguiente pasonan pa sigui.
El a indica cu e ta hopi desapunta y ta lamenta masha hopi mes e expresionnan haci door di e ex minister di Infrastructura Benny Sevinger cu a bisa textualmente “I don’t give a damn”. “Esey ta palabranan di ex minister Sevinger a bisa pa loke ta e desaster cu nan a laga atras cu e proyecto di Green Corridor”, Howell a duna di conoce. Continuando, el a expresa cu Rapport di Price Waterhouse Cooper ta indica cu tin mas cu 500 fayo cometi. Tambe corespondencianan existente ta mustra e gravedad di e situacion unda por yega hasta na declara ‘default’ di e contratista. Esaki lo significa un paro di e proyecto cu lo por tin consecuencianan pisa pa Pais Aruba. Hopi grave ta e echo cu e caminda y e famoso brug a wordo habri sin cu esakinan a wordo aproba. Parlamentario di POR ta puntra “ta ken ta para responsabel si algo lo mester pasa? Pero mientras tanto a organisa un fiesta grandi riba e brug. Ta ken a cover e gastonan y di unda e fondonan a bin?
E cosnan aki no por y no mag di bolbe sosode!” Mientras tanto ex Minister Sevinger ta bisa cu e no ta ‘give a damn’! “Wel, a nos SI ta give a damn y lo busca e miho solucion pa e situacion aki. Ora ta trata placa di pueblo Bo mester Give a Damn! Y tur loke coalicion a presenta awe ta a base di sinceridad y responsabilidad”, Alan Howell a bisa den sala di Parlamento. El a probecha e ocasion y manda palabranan di pabien pa tur esnan di oposicion cu a keda keto y no a sostene den sala di Parlamento e desaster laga atras pa Sevinger. Tambe el a gradici e profesionalnan cu a mustra na un forma neutral e situacion actual di e Green Corridor y a sostene e mocion di coalicion presenta pa su colega Marisol Lopez-Tromp, den nomber di henter e coalicion, cu ta duna Minister di Ruimtelijke Ontwikkeling , Infrastructuur en Milieu e apoderacion di Parlamento di Aruba pa inicia cu negociacionnan necesario cu Caribbean Infrastructure Company (CIC) y pa despues bin bek pa informa Parlamento di e reunion y busca aprobacion pa e proximo pasonan cu lo mester tuma. Finalizando su disertacion, Alan Howell a uza un dicho di ex Minister President Nel Oduber pa por si acaso e iregularidadnan aki lo mester pasa den futuro. “Esun cu kima mester sinta riba nan blaar”.
