Tiramentu ku morto

Djabièrnè 25 di mei 2018, alrededor di 23.44 or di anochi, Sentral di Polis a risibí notifikashon di un kaso di tiramentu ku a tuma lugá den área di Rancho. Na e sitio polis a haña un hòmber heridá drumi riba kaya den un plas di sanger. Te kaminda esaki tabata posibel i bou di e sirkunstansianan presente, por a mira ku e víktima tabatin
herida di bala na e parti ariba di su kurpa. For di un investigashon preliminar ku polis a realisá na e sitio a resultá ku un ratu promé habitantenan di den e área a tende zonido probablemente for di un arma di kandela. Ambulans ku a presentá na e sitio a transportá e víktima den situashon krítiko pa poliklínika di SEHOS pa tratamentu médiko. Alrededor di 01.10 or dokter na SEHOS a konstatá morto di e víktima. Na e sitio polis a haña i konfiská hulsnan ku tabata riba kaya. Riba òrdu di Fiskal di Ministerio Públiko a konfiská e kurpa sin bida pa mas investigashon.
Motibu di e tiroteo aki te na e momentunan aki ta deskonosi i den investigashon.
E víktima ku tabata envolví den e kaso di asesinato ku a tuma lugá djabièrnè 25 di mei último den área di Rancho, a keda identifiká komo: E hòmber Shurickson Shannon Thomasa, nasé na Kòrsou, 28 yüli 1995.