E coalicion nobo lo drenta gobernacion y topa cu problemanan latente sperando riba solucion di masha tempo caba, pero cu pa un motibo of otro no a conoce un solucion. Un di nan, cu ta di sumo importancia y urgencia, na opinion di e asociacion di hotelnan y turismo di Aruba, AHATA, ta e problema cu e planta di purificacion di awa na Bubali Plas. Separa di esey, tin retonan den leynan laboral y maneho di turismo en general cu merece extra atencion y decision urgente. Esaki ta opinion di Tisa LaSorte, CEO di Ariba Hotel and Tourism Association (AHATA), den un entrevista cu 24ora.com.
E ehecutivo di e asociacion, pero cu ta bin tambe e mes for di e industria hotelero, ta consciente cu tanten cu no drecha e planta di purificacion di awa na Bubali Plas, cu henter e area turistico ey ta coriendo un risico masha grandi. Y esaki ta un reto cu Ministerio di Infrastructura ta na altura di dje for di añanan caba y sigur den e ultimo añanan, no a logra solucion’e. E ta encera un inversion grandi cu pais Aruba tin di haci den ekiponan nobo y moderno, pero e ta sumamente necesario pasobra e ta den cara di hotelnan highrise y lowrise, pues dilanti e fuente mas grandi di nos economia.
Otro retonan cu e gobierno lo confronta riba nan prome dia di trabou ta e necesidad pa reforma leynan laboral. Tanten cu no haci esey, hotelnan pero tambe henter economia lo sufri na e reglanan estricto cu ta haci masha dificil pa negoshinan por sobrebibi den e temponan aki, den cual hopi biaha no por pronostica kico lo pasa den e lunan nos dilanti. Manera por ripara, e pandemia aki a bin cu yen sorpresa, cu cada biaha atrobe ta rekeri cambio di maneho.
Di otro banda, hopi negoshi mester a laga trahadonan bay cas door di e pandemia y caida di entrada. Pero awor cu economia ta mehorando y turismo ta creciendo, cu ora busca trahado…nan no ta disponibel mas tampoco. Pues, awor e sector di HORECA ta bibando cu un realidad cu tin demanda pero no tin sosten laboral pa cumpli cu e demanda pa servicio. No ta conoci si e trahadonan a custuma cu FASE of otro tipo di ayudo y ta opta pa no regresa na pia di trabou, of ta e mercado laboral a bira mas chikito y limita na trahado.
Pero prome cu atende cu tur cos, AHATA ta conseha e gobierno nobo pa reforma su mes. E pregunta ta, con grandi e aparato gubernamental mester ta pa por sigui opera e pais den e temponan dificil nos dilanti. Tin algun reforma pendiente, cu ta forma parti di e Landenpakket firma cu Hulanda, cu ta escencial pa ehecuta awo mesora. Djey atende cu e demas retonan den e diferente sectornan ariba menciona.
Na final e director di AHATA a anuncia cu berdad turismo ta experenciando miho temponan ultimamente. Desde luna di mei y juni bin ariba e cifranan ta mehorando basta. Pero ta keda un realidad cu e recuperacion a cuminsa despues di 15 luna di retonan pisa. Pues den dos luna hamas por papia di un recuperacion caba. AHATA mes ta pronostica cu pa aña 2022 e cifranan lo ta hopi miho cu awo. Pero, tur cos ta sigui depende di con e virus ta desaroya y efectonan riba biahamento y nos turismo.
