Ta por lo menos di dos empleado, cu na un edad relativamente hoben, ta perde nan bida den un desgracia di trafico. Diabierna anochi trahadonan di Aruba Airport Authority N.V. a tuma nota di e noticia tristo cu nan colega, Carlos Rojer di apenas 49 aña di edad, a fayece den un accidente. Diasabra tabata un dia masha pisa pa aeropuerto, den cual coleganan mester a consola otro, debi na e tristesa cu a reina den e compania.
Carlos Rojer tin mas o menos dies aña den servicio na aeropuerto. Desde su prome dia el a cuminsa traha den e departamento di auditoria y su ultimo funcion te cu diabierna ainda tabata di “Director Internal Audit”.
Diasabra mainta siguridad di Aruba Airport Authority a hisa e bandera dilanti e edificio na mita, como un muestra publico cu nan ta di luto pa fayecimento di nan colega. Bandera lo keda asina te dia cu dera e empleado di e compania.
E tradicion pa hisa bandera halfstok ta cu e pensamento, cu ta hisa e bandera di mort, den forma imaginatorio, riba esun nacional di cada pais. Pesey e bandera ta subi te mita y den algun caso por bay te na 2/3 parti di e pal’i bandera.
Carlos Rojer ta yiu di un ex-polis y ta ruman di polis Soraya Rojer. Su mayornan ta biba na Hooiberg mientras cu e mes ta biba na San Miguel. El a bay laga atras cuater yiu, dos mucha muhe y dos mucha homber. E yiu muhe mas grandi ta studia na Hulanda y tabata cu vakantie durante algun siman na Aruba y lo mester a biaha diasabra bek pa Hulanda. Diabierna anochi su tata a fayece den un accidente cu su motorcycle, pa cual e yiu a keda atras awo cu hopi dolor y tristesa.
Headlines Group, e cas editorial di 24ora.com y TREMPAN ta expresa nos palabranan di mas profundo condolencia na famia di e fayecido. Cu Carlos Rojer sosega na paz.