Parlamentario Ady Thijsen lo retira di Parlamento entrante dia prome di december 2021 pa bay Hulanda, den e funcion di representacion di Aruba na Union Europeo y Brussel. Thijsen a pasa e screeningnan necesario pa asumi dicho funcion, asina partido MEP a anuncia un rato pasa. Esaki ta di dos intencion di Thijsen pa por bay biba na Hulanda, pasobra na 2017 e no a logra y mester a conforma su mes cu e puesto di parlamentario. E biaha aki MEP a prefera di habri espacio pa un hoben drenta Parlamento y laga Thijsen uza su experiencia y conocemento como representante di Aruba den Union Europeo.
E decision dificil pero importante aki, Thijsen a tuma, riba peticion di partido MEP y despues di consulta cu su famia, en bista di e papel importante cu Union Europeo lo hunga den e fase di recuperacion di Aruba, despues di COVID. Asina Ady Thijsen lo reemplasa e representante actual pa Aruba na Brussel, esta Eddie Paris. Paris lo keda un tempo Hulanda pa asisti den e fase transitorio.
Mr. Juan Edberto “Ady” Thijsen, ta casa, tin 4 yiu y 2 nieto. El a studia ley y ta un abogado di profesion, specialisa den leynan laboral y derecho constitucional. El a drenta arena politico na aña 2005 ora a subi lista di MEP.
Den su prome salida na 2005, el a logra 818 voto, esun mas hopi te dia di awe! Den eleccion na aña 2009 el a cay den voto y a yega 414 voto, net mita. Den eleccion di 2013 el a crece y yega 475 voto, den eleccion na 2017 el a bolbe crece y a yega 511 voto riba su nomber. Sinembargo den e ultimo eleccion na juni, e politico a cay den voto cu un record den henter su carera politico, logrando solamente 183 voto riba su nomber.
Na aña 2017 el a ocupa e puesto di Presidente di Parlamento di Aruba, aunke cu su preferencia lo tabata e puesto di Minister Plenipotenciario di Aruba na Hulanda, pero esey no a logra. E. biaha aki e lo ocupa e puesto cu Eddy Paris ta bay laga atras awo, como representante di Aruba den Union Europeo na Belgica.
