Durante un conferencia di prensa teni riba diaranson, PwC Aruba a lansa nan projecto di mas nobo, esta e PwC Academy. PwC Academy ta e projecto di mas nobo di PwC Aruba, aunke mester bisa cu PwC tin algun aña caba cu nan Leadership Academy cual ta wordo duna door di e departamento di Advisory. E idea di e PwC Academy a nace ora cu PwC a ripara cu tin un necesidad den e sector laboral pa siña mas tocante topico nan di impuesto. Pa e motibo aki PwC a dicidi di trece e PwC Academy cu lo brinda e communidad di Aruba e opportunidad pa amplia nan conocimiento y siña mas tocante e diferente topico nan cu bin cune. E prome ciclo di PwC Academy lo tin topico nan di impuesto, caminda cu lo duna en total 6 training riba diferente fecha entre September te cu November venidero. Educacion ta un di e pilarnan di nos responsabilidad social y ta pa e mes’un motibo, nos ta pone enfasis riba esaki. Cu e PwC Academy, PwC ta desea di aporta na eleva e nivel di conocimiento di nos professional nan y asina contribui cu e communidad di Aruba. Cada training ta 7.5 PE punten structura y ta duna profesional nan e oportunidad pa adkiri esaki nan localmente. E training nan lo costa $475,- pa un, esaki ta inclui lunch. Si un persona ta desea di registra pa tur 6 training, e ta haña uno gratis. E training nan lo ta full dia y lo tuma lugar na Surfside Marina y un na Renaissance Convention Center. Si ta desea di registra, por hasi esaki libremente door di jama PwC Aruba na +297 522 1647 y puntra pa Geraldine Nadall. Tambe por bishita e pagina di Facebook ‘PwC Aruba’ caminda tin informacion di tur training cu lo wordo duna.
