Dialuna anochi laat pa mas of menos 10:40pm a sosode un accidente na e crusada di Weststraat y Professor Lorentzstraat na Oranjestad. Un total di tres ambulance a presenta na e sitio, pa atende e dos heridonan na e sitio di desgracia.
E vehiculonan envolvi tabata un auto marca Toyota modelo Yaris color di oro, numera A-61685 y un auto marca BMW color preto numera A-73491. Na e sitio testigonan a menciona cu e Yaris tabata riba Professor Lorentzstraat mientras cu e BMW tabata riba Weststraat. Parce cu e BMW no a duna preferencia na e Yaris, cu consecuencia cu nan a dal den otro, lagando un daño material considerabel atras.
Durante e accidente aki, dos persona a resulta herida pa cual mester a solicita cuido medico specialisa. Polis di trafico a presenta pa tuma datonan di e accidente.
Pa colmo, durante e accidente, un auto marca Nissan modelo Cube a bay bira na su man drechi, sin tene cuenta cu tabatin un auto di polis para na e skina pa evita pasada di auto. Consecuentemente e auto a bay reverse, sin paga tino y a dal den un Nissan Sentra. Pues a sosode un accidente nobo na luga di e accidente, dunando autoridad mas trabou ainda.
