Diaranzon anochi, un tiki promer cu 7’or y mey PM, habitantenan riba e caminda di Bloemond a scucha un sonido basta fuerte y mesora a sali afo na careda pa wak kico lo por a pasa. A topa cu dos auto riba caminda y ambos cu basta daño material.
Niun hende a wak con e accidente aki a pasa y tur dos chauffeur di e vehiculonan envolvi a dicidi di bandona e sitio sin warda riba autoridad legal. Ora e promer patruya di Polis a yega, a encontra un Nissan Altima y un Toyota Yaris blanco riba e caminda net un tiki pariba di e rotonde banda di santana Paradera.
Ambos auto tabata tin hopi sla y te na e rotonde banda di e santana a encontra un spiel benta abou. Segun algun informe compila na e sitio, un di e chauffeurnan lo ta un dama ilegal y no tabata kier a keda na e sitio.
Segun por compronde cu e number di e Nissan Altima tabata pertenece na un otro auto, y locual ta trata e Toyota Yaris blanco tambe su number tabata pertenece na un otro auto.
Polis y Forensys aworaki ta haya nan cu e dolor di cabez pa trata di saca afo con e acidente a tuma luga ya cu niun hende no a wak con e accidente a tuma luga y niun di e dos chauffeurnan envolvi a keda na e sitio. A yama takelwagen pa kita ambos auto for di caminda
