Splica pakico y kico ta influencia un mucha of hobennan pa comete un delito no ta facil. Pero loke si por bisa cu casi tur e personanan bou di 18 aña cu haya nan mes envolvi cu husticia, ta bini di famia den cual tin hopi cos andando. Esaki ta loke cu psikiatra di mucha Dr. Manouche van Alst a trece dilanti den un entrevista realisa door di Mark-Benson Denz pa 24ora.com.
“Por papia hopi bes di muchanan cu a pasa den hopi problema na edad hoben na cas manera trauma di mucha, violencia na cas, negligencia, hopi problema entre mayornan, problemanan financiero. Riba dje e aña tras di lomba a pone hopi presion riba famianan cu a pone e muchanan aki bou di mas presion,” e psikiatra a splica.
Casonan ora cu hobennan ta papia di scucha stemnan, e ora ta papia di psicosis. Esaki ta presente pa prome biaha entre e edadnan di 15 y 24 aña. Loke profesionalnan ta na altura di dje ta cu casi mita di e hobennan cu tin psicosis ta hobennan cu a pasa den un trauma y cu a laga nan hopi vulnerabel. Esnan cu tin pensamento cu hendenan ta persigui nan, hopi biaha tabata victima di violencia cu nan mes a comete algo asina. E imagen cu ta duna di hendenan cu ta scucha stem como personanan peligroso, por t’asina, pero mayoria biaha nan tabata victimanan di violencia.
E ta lamenta e stigmatisacion, esta cu personanan cu psicosis tur ta peligroso y mester cuida di nan. No mester lubida cu nan tambe ta un victima.
Mayornan y famia por yuda hopi na detecta e problemanan tempran. Un di e señalnan hopi trempan ta si nota cu tin problema di conducta, aunke cu e ta un concepto hopi amplio. E por tin di haber cu no ta scucha di mayornan of comete actonan delictivo. E señalnan aki ta bini trempan y ni den les nan por concentra.
