Tin un situacion caminda cu holor di gas of diesel tabata presente den dos diferente area crucial di hospital, cu tabata den OK y radiologie. Sindicato ABV ta na altura di esaki. Gina Maduro, presidente di e sindicato ta mustra cu desde aña pasa a haya informacion di e miembronan mes, laborando na e dos departamentonan aki, mas tanto na e parti di e parti di camber di operacion, unda cu tabata tin berdad molester di holor di diesel, unda cu Maduro mes a bay camber di operacion y inspecciona wak kico ta e problema. El a splica cu den un camber, tabata tin mas molester cu e otro cambernan. A sinta hunto cu gerencia di hospital, pa wak ki solucionnan tin pa e problema aki, na unda cu gerencia di hospital lo a sinta cu SOGA y otro instancianan concerni pa wak riba un solucion mas lihe posibel. Un di e solucionnan cu a bin e momento ey tabata pa paga e boiler, pero una bes cu paga e boiler, tin otro consecuencia pa e new bedtower. E ora ey no tin awa cayente y e temperatura ta bira mas friu. E tambe tin otro consecuencia.
Asina den transcurso di e simannan, y prome cu pasco atrobe, a sosode un incidente unda cu trahadonan tabata decisivo pa pone trabao abao. Como sindicato, ABV a bolbe bay interveni, purba di tene nan paden, purba di yega na otro solucion, pasobra tin otro consecuencianan. E ora ey a sinta un biaha mas hunto cu Gerencia, purba di wak con por yega na un solucion mas lihe posibel. Mientras tanto e empleadonan mes di camber di operacion a manda un carta pa diferente instancia, entre otro e sindicato mes. Tin cu bisa cu dos siman pasa a meting a tuma luga. A sinta cu minister di salud, a yama nan tambe como sindicato. A splica nan banda y a duna nan opinion riba esaki. Ta spera cu pa mas lihe posibel e rapport ta conoci y tambe solucionnan. No ta un situacion agradabel pa traha y e riesgo cu tanto e trahadonan y e pashentnan ta core. No sa ki daño e tin. E solucionnan aki mester wordo atendi mas lihe posibel.
Solucion por dura
Segun Maduro, ta wardando riba e resultado di e rapport, pasobra e ta hopi importante, pa sa a base di kico ta sali, kico ta e otro opcionnan cu por wordo haci. Pasobra no por sigui traha den un situacion asina. Tin paar di empleado cu ta malo pa e motibo aki. Cu e ta haci daño na hende, ta un hecho.
A manda señal
Sindicato no tabata tin un rol directo den esaki. Full na comienso nan tabata tin nan opinion riba esaki.
Nan tabata pro un gebouw nobo. No expansion, ni renobacion y awe por mira e consecuencia. Esey ta e eror cu a haci. Mil biaha mester a scoge pa un gebouw nobo, unda cu tin sigur cu tur departamento ta wordo traha y ningun no ta wordo lubida y bo no tin molester. E problema mas grandi y hopi fastioso ta, renoba, expande y durante cu hospital ta operando. Tin hopi molester. Tur e trayectonan, e fase aki a trece hopi problema. Tabata tin hopi keho di e miembronan. E desordo, e stof. Tabata tin hopi molester y cu e rapport pa elimina tur e consecuencianan. Toch e tabata un molester. Tin pashentnan cu ta eynan cu ta bin eynan pa haya nan servicio y cu tin cu descansa. Pero cu tur e desordo cu tin y awo vooral cu nan ta paden, ta bay tende mas. Esey tabata un di e problemanan cu mester a scoge pa un gebouw nobo y no pa expansion y renobacion.
Ora cu e trabao ta cla
Maduro a indica cu nan ta den dje caba y no por hal’e atras. Ta purba di saca lo maximo awor aki. Tin cu wak con pa instancianan con pa sinta hunto pa wak, pa evita situacionnan asina, pasobra e fasenan di renobacion ta sigui. Expansion ta sigui y mester evita situacionnan asina.
Edificio nobo, pero ekiponan bieu
E fase cu ta cla ta bunita, sinembargo. Ta haya reaccion di pashent, di turista, emergencia hopi bunita, pero falta personal, falta ekipo, falta material. Ta bay over den un gebouw nobo, pero a bay cu tur e ekiponan bieu. Ta spera cu pronto nan lo haya nan ekiponan nobo, e camanan nobo, monitornan nobo y materialnan. Esey ta e deal cu no solamente e gebouw ta nobo, sino ta inclui tur material nobo. Ta bay over den un gebouw nobo, pero no a bay cu ekiponan nobo pasobra nan no tey ainda.
