Awe mainta defensa, abase di rapòrt di kuater eksperto, den tres ora atraves di e hurisprudensia aktual, literatura i echonan saka for di e dosier, a demostrá korte ku e demandanan di ekspropiashon no tin base. Ministerio Públiko no por a trese dilanti niun argumento ku kontenido i konsekuentemente no a kumpli ku e karga di demanda.
E echo ku korte mester a tuma 3 dia pa por a trata e kaso di demanda di ekspropiashon, ya kaba ta demostrá ku un sentensia den e kaso penal Babel no ta nifiká outomátikamente ku un persona a enrikesé su mes personalmente i ku outomátikamente por kita e sèn ei di dje. Esaki ta un malinterpretashon di Ministerio Públiko i awe esaki a bin dilanti den korte. Tambe a keda demostrá dor di defensa ku sigur no por papia di enrikesimentu personal.
E aktivonan di un NV, BV, SPF, fundashon òf Ltd no por keda identifiká ku e kapital priva di un persona. Esaki ta loke Ministerio Públiko a pretendé ku e kaso aki. Esaki ta otro punto ku defensa a koregí.
Defensa a pidi korte pa duna sentensia den e kaso di ekspropiashon te ora Hoge Raad den kasashon duna su veredikto, ya ku e sentenshanan no ta establesé ainda.
Defensa a pidi korte si por duna un sentensia mesora pa rechasá e demandanan. Pa ku esei wes a bisa ku e mester di mas tempu i a stipulá e desishon final pa 30 di ougùstùs pa mitar di 2 di mèrdia, esaki entre otro debí na e kompleksidat di e kaso. Esaki tambe ta otro prueba ku Ministerio Públiko su ponensia di konfiská e sèn mesora despues di sentensia, no ta korekto.
