“E tabata intimidante”, asina abogado mr. Vito Carlo di David Kock Legal a cuminsa na bisa durante un entrevista exclusivo cu 24ora.com na Miami, Florida. E abogadonan di David Kock Legal ta na Miami pa un encuentro importante. A finalisa y concretisa e acuerdo entre e bufete di abogado local y esun Mericano, esta Diaz-Reus. Carlo ta impresiona cu e acuerdo aki. Durante e merdia cu a reuni cu e abogado y ‘managing partner’ Micheal Diaz, el a ricibi masha hopi informacion.
E bufete di abogado cu oficina rond mundo, ta trata casonan “high profile” y pa Carlo, esaki ta algo impresionante mirando cu no ta locual nos ta conoce na Aruba. E ta un challenge pero e ta interesante, pa cual ya por premira cu den future lo trece hopi trabou pa e abogadonan di David Kock Legal. Como abogado jong pero reconoci na Aruba, Carlo ta mira e aliansa internacional aki como un “next level” den abogacia. Tur cos ta comercial awendia.
Ora wak Aruba, nos ta deal diariamente cu asuntonan internacional sin cu nos ta consciente. Mira riba por ehempel empresarionan hotelero, mayoria tin relacion directo cu Merca, Colombia y Venezuela; pa cual ta trece leynan internacional cu ne. Pues, pocopoco David Kock Legal lo ta ekipa pa brinda e servicionan aki tambe. Un di e partinan cu sigur ta hopi atractivo pa nos isla pa e servicio migratorio. Tin hopi caso na Aruba cu migracion Mericano a nenga nos yiunan di tera entrada na Merca. Antes, e abogadonan ta conseha e clientenen pa busca conseho y representacion di un abogado Mericano, awendia, esaki no ta necesario mas mirando cu David Kock Legal mes lo por brinda tipo di servicio asina.
