Abogado Sjiem Fat contento y satisfecho cu decision di corte den caso di Frank Hoevertsz

Recientemente a tuma luga e caso di Frank Hoevertsz, unda cu hues a dicta cu e ex director di Utilities a ricibi cierto compensacion.

Abogado Hans Sjiem Fat, el a splica cu nan ta hopi contento y satisfecho cu decision di corte. Tur acusacion contra sr. Hoevertsz di parti di Utilities y e gobierno actual, a wordo rechasa pa corte. Corte tambe a dicidi cu no tabata tin motibo urgente pa kita sr. Hoevertsz como director di su puesto.

Director di Utilities a gana: Hues a desbarata tur cos di gobierno contra Frank Hoevertsz

Director di Utilities a gana: Hues a desbarata tur cos di gobierno contra Frank Hoevertsz

Posted by 24ora on Friday, April 12, 2019

Tambe, abogado Sjiem Fat  ta splica cu a tuma nota di e reaccion di partido MEP y di prome minister, sra. Evelyn Wever-Croes riba e decision den e caso aki y a keda asombra. E reaccion ey ta bisa cu corte lo a dicidi cu sr. Hoevertsz no tin culpa di e mal maneho cu a wordo hiba durante e ultimo ocho aña den Utilities pasobra el a actua riba instruccion di e gobierno anterior.

Esey, segun Sjiem Fat, ta un mal interpretacion di e decision di corte pasobra, corte ningun momento a bisa cu tabata tin mal maneho den Utilities den pasado. Locual corte a bisa ta algo full otro.Corte a bisa cu ta constata cu tin dos filosofia riba con gobierno mester anda como accionista cu e companianan di utilidad, e companianan estatal en general. E gobierno anterior tabata bisa cu loke ta trata e companianan di utilidad, gobierno ta haya cu tin cu tuma un rol proactivo. Mester dirigi e direccion cu e companianan ta bay. Mester dirigi e maneho na un manera proactivo pa e companianan aki tambe por contribui na realisacion di e agenda di e gobierno riba tereno di energia, es decir, promocion di energia alternativo.

Mesun momento corte a constata cu e gobierno nobo tin un otro filosofia, unda e ta bisa cu gobierno mester mantene su distancia di e companianan di utilidad y laga maneho di e compania den man di directiva y e comisarionan.

Corte ta bisa tambe, pa dicidi den e caso aki, si e retiro di Hoevertsz tabata husto, no ta necesario dicidi cua di e dos filosofianan aki ta corecto.

Locual ta importante, corte a bisa ta cu e defensa di Hoevertsz, cu 1. Tabata tin base den statuto pa gobierno como accionista por duna instruccion na directiva, e hecho cu e corporate governance code di e companianan aki, tabata pa duna base na gobierno duna instruccion na directiva, hecho cu e companianan aki tabata tin un posicion clave pa loke ta suministro, produccion y distribucion di energia, ta trece cune cu gobierno por a duna instruccion y Hoevertsz por a sigui instruccionnan di gobierno anterior riba e tereno aki.

Esey ta nifica tambe, cu tur actividad cu a duna culpa na Hoevertsz cu Utilities a organisa, manera e organisacion di Green Conference, e compra di edificio di Edward Cheung pa hiba TNO Caribbean partner strategico di gobierno den dje, y pa pone oficina di Utilities mes den dje. E biahenan pa exterior, pa promove Aruba como pionero riba e tereno di energia sostenibel, promocion di diferente proyecto manera Parke di Molina y solar panel projects, pagonan na consehero y empresanan liga na gobierno anterior, pa servicionan cu nan a presta na Utilities y e sosten tambe cu a duna gobierno den su esfuersonan pa habri e refineria door di CITGO, corte ta haya cu tur e actividadnan aki tabata legitimo, mirando e statuutnan di Utilities, mirando e corporate governance code y e maneho y filosofia di e gobierno anterior, over di su posicion como accionista di Utilities. E gobierno nobo tin otro filosofia. Si e gobierno nobo kier hiba un otro maneho, ta su derecho, ta su prerogativa, pero no por bisa cu door di esey e maneho cu a wordo hiba den pasado tabata un mal maneho. Tumando tur esey den consideracion, corte a stipula cu Hoevertsz mester haya un suma considerabel pa cuminsa, como compensacion y tambe cu e tin derecho pa haya e suma di compensacion cu a wordo cumbini den su contract di empleo cu Utilities. Click AKI pa lesa e uitspraak

Comments

comments