Recientemente Ricardo Bernardo Statie a cumpli e edad respeta di 105 aña. Su yiu muhe Fidelia, a conta cu su tata a nace na 1914 na Antriol, na Boneiro.
El a bandona Boneiro na edad di 13 aña ora el a bay nabega, cu e tempo ey tabata hopi na moda. El a yega Aruba for di aña 1927 te cu awor aki. El a casa aki y tur su yiunan a nace na Aruba. E ta sinti su mes of mas Arubiano cu cualkier Arubiano.
Ricardo Statie ta un tata orguyoso di 4 yiu, di cual lamentablemente un no ta na bida mas. Su ruman Seferina Cecilia biba na Boneiro a cab’i cumpli 101 aña.
E yiunan di Ricardo Statie a tene un misa p’e. El a bisa cu e no kier fiesta, sino misa, pues a cumpli cun’e. E tabata hopi contento cu un misa canta.
Despues a tene un fiesta chikito p’e, pa asina celebra hunto cu famia.
Palabra di pabien ta bay pa Ricardo Bernardo Statie, cu un edad cu hopi hende por tin envidia riba dje. Cu e cumpli hopi aña mas di bida hunto cu su sernan keri.
Ricardo Statie ta e hende homber di edad mas avansa na Aruba. Sinembargo e ta e di tres ciudadano mas grandi di Aruba. E di dos ta apenas algun luna mas grandi cune. E habitante mas grandi di Aruba ta Mary Benjamin (108 aña), naci dia 14 di Juli 1910 na Sint Kitts. Estadistica ta bisa cu tin 9 habitante riba 100 aña na bida riba nos isla; nan ta un di 108 aña, dos di 105 aña, un di 103 aña, tres di 102 aña y dos di 100 aña. Mester bisa cu tin tres ciudadano cu e aña aki ta cumpli 100 aña di edad.
