E dos casonan den corte di Amsterdam Manor Beach Resort y Isla di Oro a hala atencion di hopi hende. Tambe di e abogado y columnista mr. Dello Gomez. Tur dos tabatin gobierno como un partido envolvi. Y aunke e dos casonan ta diferente similar. Cu diferencia di un di e casonan unda e hurista di gobierno a dicidi di wraak un hues.
“Na momento cu bo dicidi di wraak un hues, ta nifica cu bo ta haya cu e hues pa un of otro motibo no t imparcial mes. Na momento cu esey pasa, e hues mester para e caso y manda e peticion pa un wrakingkamer pa un grupo di hues, cu no ta esun envolvi, pa dicidi of evalua e decision.”
E basenan riba cual por pidi un wraking, segun mr. Dello Gomez ta splica, ta limita. Di e contenido di e PV e mes por a compronde cu e hurista Emerencia (Gobierno di Aruba) a haya cu e hues no ta imparcial. Esaki pasobra e hues a haci un comentario cu gobierno ta conoci pa na mas cu un ocasion di no ta cumpli cu sentencia di hues. Pa cual motibo un dwangsom contra gobierno lo ta na su luga.
Den e caso di Amsterdam Manor, e mesun departamento di gobierno (hurista) a confirma den corte cu gobierno na mas cu un ocasion no a cumpli cu sentencia cu corte a dicta contra nan. No solamente sentencianan, pero tambe corte a haya nan mes obliga di pone dwangsom pa pusha y obliga pais Aruba di cumpli cu e sentencia. “No solamente e dwangsomnan ey a wordo poni pero Amsterdam Manor a haya su mes obliga tambe pa cobra e dwangsomnan.”
E abogado a bisa cu loke cu e kier ilustra ta cu gobierno den corte ta rabia cu un hues, wraak e magistrado, debi na e pensamento cu e no ta imparcial pa bisa cu gobierno ta conoci di no cumpli cu sentencia tur ora, y di otro banda ta para cu cara seco den corte admiti di no a cumpli cu sentencia. “No solamente Departamento Huridico a confirma esey, pero Director di DOW tambe tabata presente y a confirma esey.”
Gomez, kende tabata presente den corte pa ambos caso, tin e pensamento cu ta bay rechasa e peticion pa wraking.
