E conocido lider politico di Sint Maarten, esta Theo Heyliger di Partido UPP, cu Polis a detene recientemente, a yega Boneiro awenochi pa pasa su detencion preventivo den e prizon nobo na Boneiro, Justistiele Inrichting Caribisch Nederland (JICN). Esaki despues cu Hues Comisario a prolonga su detencion preventivo cu 8 dia mas.
Motibo cu a opta pa traslada e politico preso for di Sint Maarten pa Boneiro ta basa riba e realidad cu prizon Point Blanche na Sint Maarten a alcansa su capacidad maximo di 70 preso. Wanta e lider politico cera den prizon di Warda di Polis na Philipsburg tampoco ta un opcion.
Despues di a haya hopi critica for di instancianan internacional, Ministerio Publico di St. Maarten a dicidi di adapta su maneho relaciona cu detencion di presonan. E maneho nobo ta encera cu, pa garantisa derecho humano di cada sospechoso, cu no por cera un hende pa mas cu 10 dia na Warda di Polis. Menornan di edad por keda te cu un maximo di 3 dia so cera den cel di Warda di Polis, sea cual sea e crimen cu nan a comete.
Na mes momento Husticia na e pais St. Maarten a defini cu e capacidad maximo di e unico prizon eynan ta fiha na 70 preso. Awe mes Ministerio Publico a hay’e obliga di laga tres preso den libertad, debi na sobre populacion den e prizon, cu mesora ta hiba na violacion di derecho humano. E tres presonan aki a sinta mayoria di nan castigo caba y lo a sali for di prizon e luna aki, pues a sali awor algun dia adelanta.
E situacion di prizon Point Blanche ta serio y e oficina di Procurador General ta teme cu e retonan di capacidad lo empeora den e dianan nos dilanti. Esaki specialmente despues cu Corsou a anuncia di lo manda 7 preso bek pa Sint Maarten.
Ministerio Publico a bisa cu e decision aki di tene e politico di St. Maarten cera na Boneiro ta un solucion temporal.
