Reclassering tabata tin un presentacion diabierna mainta di un proyecto cu ta trahando riba dje, hunto cu sr. Jean Paul v/d Kuyp, unda cu e tin un fundacion na Colombia, caminda cu e ta trata hoben y adultonan cu problemanan di adiccion.
Seraida Pemberton, directora di Reclassering, a splica cu a sinta cu v/d Kuyp y hunto a bin cu un proyecto den cual cu ta bay tuma of ricibi hobennan cu problemanan di comportacion y adiccion, pa asina den un setting residencial, nan por haya e guia y ayudo necesario.
Tin un problema hopi grandi na Aruba bao di nos hobennan. Como fundacion, Reclassering ta esnan cu ta duna guia na e hobennan. Por ripara cu guia ambulante no ta yuda den hopi caso.
Ta pa e motibo aki mes a boga hopi aña caba pa bin cu algo pa e hobennan. Esaki ta algo hopi necesario. Ta saca e hobennan for di nan ambiente, duna nan e guia necesario y asina por stabiilsa nan pa nan por funciona stabil den nos comunidad bek.
Segun Pemberton, e proyecto mes por vang op 20 hoben di edad di 16 pa 25. A his’e pa 25, pasobra e kalender leeftijd ta mayor di edad. Pero e hoben den su desaroyo e ta riba un nivel hopi abao.
Ta wak cu e cantidad di hobennan cu Reclassering ta haya ta por lo menos 100 pa 120 hoben, te cu 25 aña. E proyecto aki ta acapara unicamente 20 hoben. E ta un pilot y lo wak con e ta bay. A base di esey ta pidiendo sosten di tur hende pa e proyecto, pa no unicamente draai pa un aña, sino sigui cu algo asina na Aruba.
A invita diferente instancia cu tin di haber cu hobennan cu comportacion problematico y di adiccion, tambe psikiatrico, pa asina hunto nan por wak e proyecto, kere den dje y sosten’e.
Tin fundacion Guiami, tin Directie Sociale Zaken, tin Ministerio Publico. Tin diferente instancia cu tin di haber cu e problematica aki, pa asina por traha hunto riba e problema.
Fuera di esey, Pemberton a agrega cu Reclassering tin e proyecto aki pa su mes. Conhuntamente cu Jean Paul v/d Kuyp na Colombia, aunke cu el a nace y crece na Aruba, pero e tin un fundacion na Colombia y el a bin Aruba, hunto cu Reclassering, habri un fundacion nobo cu ta specialisa den e opvang.
Naturalmente e parti di e crisisplan ta e sosten cu por haya pa haya e personal y e parti financiero cu lo por yuda.
Pemberton a comenta cu nan tin hobennan cu ta cay cera y ora nan haya e ayudo necesario, nan ta stabilisa. Den e setting residencial, no tin asina tanto experiencia. Den pasado Reclassering tabata tin un proyecto cu ta guia Kamerwonen, cu tabata tin por lo menos 12 hoben cu a pasa door di e trayecto y di e 12 n’ey e portanan a cera pa motibonan financiero na 2017.
Te awor aki ta 4 so a cay bek cera. Esey ta mustra cu e tipo di aanpak eynan, ta yuda. Awor aki tin basta confiansa cu e proyecto aki tambe lo ta e mesun cos cu e resultadonan. Bo ta saca e hoben, duna nan un ayudo, un guia. Cu e aanpak aki bo ta yuda e hoben den un ambiente familiar. E ta bay biba den un cas y den e cas bo ta yuda e hoben cu e diferente habilidadnan cu e tin.
Tin diferente manera cu un hoben por drenta den e proyecto, sea via husticia of via di Directie Sociale Zaken. Mayornan tambe por acerca nan y pidi pa nan yiunan por wordo hinca aden. Ta purba pa na momento cu e hoben drenta, e no ta facil pa e hoben sali. Ora un hoben ta den un setting asina, e ta rebeldia y e kier bay cas y esey kier evita.
Ta pesey ta boga pa ta un tiki mas strak pa e bay via Husticia cue hoben ta obliga pa keda den e proyecto pa e tempo cu ta necesario pa su rehabilitacion.
Reclassering ta sinti falta di proyectonan asina. Hopi di e hobennan no ta ambulante, bo por guia nan. E ta bin cerca bo, bo ta papia cun’e, pero e ta bay bek den su ambiente.
Pero den un setting asina, bo ta sak’e temporalmente for di su ambiente y dun’e e guia necesario. Na Aruba no tin hopi di esey, segun Pemberton.
