Corte a trata e caso penal contra Angelexcinio Croes, Ruthley Zievinger y Kendrik Wernet, acusa di a viola ley di droga pa ta complice of tabatin droga den nan poder dia 19 di mei 2018. Un caso increibel cu a sosode den dia cla. Tur a admiti di tabata presente pero ningun tabata sa cu nan a participa den e transporte di droga of pio, di ta doño di e droga. E tempo ey a detene hasta tata di Croes, un ex Inspector di Polis, awendia pensiona, cu a sigura cu no tabata sa cu ta warda droga na su cas.
E caso a cuminsa lora dia 19 di mei ora cu CID (Centro di Inteligencia) di Polis a haya informacion via di un yamada anonimo cu e acusado Croes tabata bahando droga e momento ey (mainta) na su cas na Casibari. E droga a caba di yega y drenta na unda ta baha boto dilanti ex Cas di Gobernador.
Autoridadnan concerni a cuminsa un proceso rapido pa haya e permiso necesario y hunto cu Hues Comisario a yega na e cas na Casibari, unda a bin haya dos icejug cu 99 paki di cocaina. A confisca un speedboat. E 99 pakinan tabatin un peso total di 110 kilo. Den forma “random” a saca test for di 20 cu a wordo manda laboratorio y esaki a test positivo pa cocaina.
E investigacion haci a conduci na detencion di Croes, como doño di e tereno unda a haya e droga; Zievinger, kende a uza su pick-up pa lastra e boto, hunto cu Wernet, kende aparentemente tambe a bay haci un hende un fabor di busca auto pa lastra un boto hiba bek Casibari. Pues nan ta bisa di no tabata sa cu tabata trata di droga, mientras Croes ta bisa cu e boto no ta di dje pero di un Venezolano cu e ta huur un espacio cun’e pa 250 florin pa luna.
Henter un investigacion y no por saca afo cu siguridad y exactitud kende ta doño di e 110 kilo di cocaina cu e tempo ey tabatin un balor di un poco mas di mey miyon dollar.
Di e tres acusadonan aki, Zievinger ta e unico cu a yega di wordo condena, pa violacion di ley di droga. Pero ta resulta cu Zievinger y doño di e tereno unda a haya e droga, esta cas di Croes, no ta “on speaking terms” cu otro.
Na final Fiscal a haya cu tur ta culpabel, por lo menos di complice. Croes tabata esunnan cu a organisa e transporte, den pensamento di Fiscal, a uza Wernet como chauffeur y Zievinger a haci uzo di su pickup pa transporta e droga y Fiscal no ta kere su storia cu e no tabata sa nada di esaki, ya cu henter e asunto tabata masha straño.
Pa Croes, considera e organisadonan, a pidi 7 aña di prizon; a pidi un castigo igual pa Zievinger, mirando cu el a caba di sali di KIA pa violacion di ley di droga tambe. Pa Kendrick Wernet a pidi 5 aña incondicional. E tin un caso mas contra dje cu ta heling di un DJ-System cu el a cumpra procedente di robo. Aki dos siman tin sentencia.
