Diaranson den oranan di mainta trempan banda di Fatima College y Jacintha Kleuterschool na Dakota a sosode un caso hopi serio, un pickup blanco cu stripe di candela y un Toyota Tercel a pasa den Pindastraat y los tiro. E muchanan tabata tur spanta y di biaha a notifica Polis, cu a cuminsa un investigacion di e caso. E persona cu a los tiro no a tira na halto, pero a haci esaki den direccion di e mata unda cu tabatin cantidad di mucha.
E muchanan a core bay cerca Milton Sjen Liep Shi, Interne Begeleider di e Scol y cabesante interino, kende tabata sinta dilanti oficina cu un otro docente. Segun Milton Sjen Liep Shi nan a tende un tiro, di cual nan a kere tabata un klapchi. Muchanan a acerca su persona y un di e muchanan homber a bisa cu nan a tende un tiro. Un otro a informa cu el a mira cabes di un arma, mientras un di nan a bisa cu el a sinti algo cayente pasa banda di su pia. E muchanan a spanta y di biaha nan a core bay paden.
Despues di a tende kico tur e muchanan a bisa, a avisa polis di e situacion. Polis a yega scol y pa haci un investigacion. E muchanan tambe a duna nan testimonio di loke nan a mira y scucha. Esunnan cu a tira no a tira riba e muchanan, asina Sjen Liep Shi a expresa. A yama e mayornan di e muchanan pa asina acompaña nan pa bay warda di polis y despues por regresa bek scol. Tur e añanan cu Sjen Liep Shi ta trahando na e scol ta basta trankil y esaki ta algo prome biaha e ta experencia den e bario di un tiro basta trempan.
Franklin Richardson, Cabesante di Fatima College, tabata na un reunion y a ricibi un yamada di Milton Sjen Liep Shi. El a bay warda di polis pa asina haya mas informacion di kico a pasa. Sjen Liep Shi a haci un bon trabou di a yama e mayornan, kendenan a bay scol di biaha, asina e cabesante a bisa. El a papia cu Slachtoffer hulp, kende a bisa cu e muchanan tabata basta nervioso. E muchanan a bisa slachtoffer hulp cu nan a mira arma, un a sinti cayente na su pia, a mira un pickup y Toyota Tercel color cora, pasa riba e caminda.
E muchanan a bisa di a scucha 3 tiro. Awo ta bay pone mas atencion rond di scol, polis ta bay pone mas vigilancia den e bario y esaki ta prome biaha cu e situacion aki a pasa. “Ta spera cu esaki no pasa mas. Ta lamenta si un bala por a yega e muchanan aki.” E muchanan aki ta inocente, pasobra nan ta cana bay scol y pa nan yega scol asina aki.
E muchanan no por concentra pa tur loke a pasa. E momento cu esaki a pasa tabata uno hopi druk, pasobra mayornan tabata baha muchanan y e trafico tabata un tiki pega. Mester bay mira e situacion aki un tiki mas di acerca y cu ayudo di polis, lo bay pone atencion na esaki. E cos aki no mag di bolbe ripiti, Richardson a bisa.
Tin bisiñanan rond cu tin camara y cu permiso di SKOA e cabesante lo acerca esunnan cu tin camara pa mira si por haya e grabacion pa mira si por haya e number di auto y saca mas detaye y duna polis esaki. Ta spera cu por haya mas informacion y asina pone man riba esunnan cu a haci e cos aki. Un di e muchanan a describi na polis con e persona tabata bisti y tambe con e persona ta ziet er uit. Polis a investigacion den e area y no a haya huls tira rond.
