Diabierna anochi alrededor di 10:30pm bisiñanan atento a bati alarma p’un situacion basta delicado na un compleho di basta apartamento den Nobelstraat na Playa. Den nan tin un homber di edad ta biba hunto cu su señora. E ta conoci como “Morales”. Bisiñanan a conta cu nan tin como dos dia sin mir’e. Semper e ta lanta mainta trempan y ta cana rond den cura, pero awe ni ayera no a topa cu ne.
Den oranan di anochi un bisiña preocupa a dicidi di bay mira kico por a pasa. El a bati varios biaha na porta y bentana pero sin resultado.
Esey tabata suficiente motibo pa yama polis y ambulance. A logra drenta paden y a topa cu e homber den su camber. Personal di ambulance no por a haci mucho. Pa 11:05pm Dr. Texier a presenta na sitio pa constata morto di “Morales”. Parce e meneer su casa ta den exterior n’e momentonan aki. Nos ta expresa palabranan di condolencia y deseo di hopi forsa na famia cu a keda atras den hopi tristesa.
