Recientemente a tuma luga eleccion pa un directiva nobo pa Sindicato di Maestronan di Aruba, SIMAR. Esaki despues di un temporada di bastante turbulencia den e sindicato y cu scarsedad di interes pa drenta directiva y hasta pa atende reunionnan general pa vota pa un directiva nobo. Ora cu a nombra un directiva temporal, tambe miembronan a tuma retiro, cu a haci e necesidad pa un directiva permanente mas urgente ainda.
Te cu recien, e directiva di SIMAR, cu tin 49 aña di existencia, tabata consisti di Sheila Lazo-Tromp como Presidente; Natalie Carlo como Tesorero; Maroeschka Cornelie como Secretaria; Demas miembronan tabata: Carolina Kelkboom como Vice-presidente y Mariela Kelly como 2° Tesorero.
Den un sala mas yen cu normal y cu mas miembro cu normalmente sa atende reunionnan general pa eligi directiva nobo, a tuma luga e eleccion tan spera. Miembronan di SIMAR a eligi 7 di e 8 miembronan cu a pone nan mes disponibel pa un funcion den e sindicato.
E directiva nobo ta consisti awor di:
- Josephina Martilia-Albertus como Presidente
- Anthony Figaroa como Secretario
- Jahaira Desir-Falcon como Tesorero
Demas miembronan di directiva ta:
- Dwight Mata
- Natalie Carlo
- Otami Thomasia
- Edwin Duijneveld
Palabra di felicitacion y hopi exito pa e proximo temporada pa e directiva di SIMAR, cu tin como meta defende y traha na interes di docentenan di scol riba nos isla.
