Dialuna, 4 di Februari tabata tin e develo di e Wall of Fame na entrada di Carnival & Entertainment Village. Despues di a tende nos himno canta pa Richard “Tatoo” Quandt, Edwina Werleman, presidente di Stichting Musica, a comenta cu esaki ta un soño pa San Nicolas y pa Aruba en general.
Aruba Caiso & Soca Monarch lo hiba un streya mas riba loke
a pone den e ultimo añanan, y pa asina hiba tur hende riba e proximo nivel. Werleman a gradici tur esnan cu ta sinta crea y ta reconoce y duna balor na nos artistanan di Aruba. E hecho aki a tuma luga net prome cu e prome prefinal a tuma luga. Ministernan Xiomara Ruiz Maduro y Otmar Oduber, presente na e evento, a devela e muraya di fama, caminda cu por a mira diferente plakkaat cu nomber di e artistanan cu a yega di sali, sea un Calypso King of Roadmarch King.
Fuera di e Wall of Fame, a inaugura tambe e waterval. Tambe a honra 8 baluarte den e mundo di Calypso y Roadmarch, kendenan ta entre otro Leonard “Lenny” Denz, Roberto Geerman, Alberto Panthophlet, Hubert “Jubby” Naar, Juan Carlos Hill y Johan Milan. Sin laga afo, Prins cu Pancho y Reinanan, tambe a forma parti di e anochi di inauguracion. E anochi a cera cu un ambiente unico cu Musical Time so por bin cun’e y trece tur hende bek den tempo.
