Diamars, den oranan di atardi, pasa di 3’or, polis di Playa a bay duna un asistencia den Dadelstraat. E motibo di presencia di polis ta pasobra cu un hoben, un mucha homber basta jong, a maltrata y insulta su ruman muhe.
E mucha muhe a bati alarma y a bisa polis cu mas cu un biaha caba, e ta wordo maltrata. Ta trata aki di un famia Haitiano y den e caso aki, ora cu polis a yega, e hoben a disparce. Pero, polis a logra pa bay su tras y finalmente ta bin logra top’e tambe na altura di Mamoticastraat. Eynan ta bay over na detencion, pero, e hoben aki ta un hoben sin respet pa autoridad entre otro.
Nan a atende cun’e, a listre, etc. y pidi pa dogcatcher pa asina bay cun’e warda pendiente denuncia cu e ruman tambe a dicidi cu lo bay haci. Parce cu mas cu un ocasion caba y segun bisiñanan ta conta, e hoben aki ta causa problema y ta un menasa pa e vecindario. Hasta ta bisa cu e lo sa cana arma. Polis no a haya arma riba dje, ni arma blanco, ni arma di candela. Si ta e caso cu nan tin e atencion riba e situacion. Nan a bay bek despues di detencion. A bay bek na e cas den Dadelstraat y e ruman muhe a compaña polis pa warda, unda cu eynan lo e haci denuncia oficialmente contra su ruman homber, cu un biaha mas ta agridi’e y tambe ta insult’e.
Ta un problema na cas. E hoben ta biba na cas di su mayornan y e ruman muhe tambe ta biba eynan. E biaha aki cos a bay for di man cu e ruman muhe a bisa ta basta. A dicidi e ora di yama polis pa caba cu e problema cu pa basta tempo ta reina den nan hogar den Dadelstraat.
