Awe merdia mas o menos 2:30pm Polis a informa cu a detene Kenny Dirksz den area di Zeewijk, como e sospechoso principal di a asesina Natasha Kock di 33 aña awe mainta den su cas situa den Tobelstraat na San Nicolas. E sospechoso tin dos yiu cu e victima.
Prome cu a logra detene mes, a topa cu su auto, marca Nissan modelo Sentra color blanco, na altura di Zeewijk mes. A tuma e auto den beslag pa investigacion. For di eynan a start un buskeda, cu a inclui uzo di helicopter, pa yega na e sospechoso.
E investigacion apenas a cuminsa y ta den man di Recherche di e districto di San Nicolas. Tin varios version di testimonio di testigonan. Un di nan cu a yega na nos redaccion ta bisa cu un yiu a haya e mama benta na suela y a bay bati alarma na cas di bisiña. Di eynan a yama pidi Ambulance, cu na nan turno a informa demas autoridadnan envolvi cu tipo di casonan asina.
Na e sitio paramediconan no a logra haci mucho, sino di pidi pa un Dokter bin na e sitio. Dr. Texier a presenta y a confirma cu e victima tabata morto. Tambe a conclui cu no ta un morto natural, pasobra a nota marcanan di violencia riba curpa di e victima. Ta sospecha cu a choca e victima te cu el a muri.
Kenny Dirksz ta naci dia 3 di februari 1966 y tin dos yiu cu Natasha Kock. Bisiñanan a conta cu el a yega e cas awe mainta y despues a bandona e cas manera nada no a pasa. E no a informa ningun hende di locual el a caba di comete.
