Diasabra dia 27 di april proximo, Dia di Rey e celebracion grandi lo tuma lugar na
Archivo Nacional Aruba. Riba e dia aki nos di Fundacion Amigonan di Archivo
kier trece e comunidad hunto pa den un forma festivo celebra e dia aki cu un
evento cultural, educativo y deportivo pa grandi y chikito.
E actividad aki ta wordo organisa den coneccion cu apertura di un exposicion di
Archivo Nacional Aruba titula “Aruba den tempo di e Cleronan Hulandes”. Ta
trata di un exposicion di un coleccion sumamente bunita y unico di documentonan
y particularmente potretnan di Aruba den e añanan 40 pa 70 di siglo pasa.
Atraves di e exposicion aki, lo mustra e influencia Hulandes riba e diferente
aspectonan di nos desaroyo. E exposicion ta dirigi riba e relacion y influencia di
nos Clero Hulandes cu a biba y traha na Aruba y nos comunidad, particularmente
pa e parti educativo, social y deportivo. Un coleccion di potretnan di e.o. Frere
Theodorus Dubois, Frere Edgar, Almoezenir/Kapelaan Delnot y tambe di UNOCA.
Banda di e exposicion di ANA, nos fundacion lo organisa pafor riba e parkeo di
Archivo Nacional Aruba un festividad cultural cu un variacion amplio di cuminda
di nos cultura, bailenan folklore, musica y particularmente pa entretene e gran
publico nos kier trece bek e cultura di Aruba di “Weganan Popular” pa grandi y
chikito (cu tambe ta un herencia di e Clero Hulandes).
Y pa e muchanan mas chikito un kids corner. Nos intencion ta pa tin un dia familiar pa asina siña di nos cultura, nos custumbernan y pasado, come cu otro, hunga wega y combersa cu otro y haya sa mas di nos historia. E Festividad ta tuma lugar riba diasabra Dia di Rey, 27 di april di 9.00 a.m. pa 6.00 p.m. riba e tereno di Archivo Nacional Aruba, situa na Sabana Blanco 60. Musica lo ta bou encargo di pa Papito y su Biba Lekker Band, DJ New Born y ZETA Band.
