Di acuerdo cu e reglanan pa e aña aki, ciudadanonan Hulandes cu derecho di voto, identificando nan mes por sostene un di e ocho listanan politico cu ta aspira pa participa den eleccion parlamentario 2021. Un di e reglanan ta cu cada ciudadano por sostene un lista. Pero un politico a haci un intento pa estafa e sistema y purba firma dos biaha pa e mesun lista. E empleado publico na Censo a stroba e proceso y a traha un proces-verbaal di e susedido.
E persona cu a purba esaki ta e propio politico John de Haseth di partido Pueblo Prome. El a firma pa su mesun partido caba pero…a purba firma un di dos biaha pa e mesun partido. Locual e no a conta cu ne ta cu e proceso ta digitalisa y e sistema ta sincronisa cu otro. Tanto e dependance di Censo como e MFA di Noord y esun di Savaneta ta riba e mesun red di data y ta comparti informacion cu otro. Asina ora John de Haseth a purba bolbe firma pa Pueblo Prome, mesora e sistema a avisa y e empleado publico a hala su atencion riba su intencion.
“Mi djis kier a check si e sistema ta funciona”
Siendo un politico di un partido envolvi pa haya firma di sosten, mesora e acto a hala atencion y a bira un proces-verbaal pa asina certifica e hecho aki. Na momento cu e empleado publico a hala atencion di e politico, puntrando dicon bo kier firma si bo a firma caba, el a contesta: “Mi djis kier a check si boso sistema ta funciona”.
E palabra corupto ta persigui de Haseth
E acto aki a bin net un dia despues cu e mesun John de Haseth a ataca e director di Censo y Registro Civil publicamente dilanti edificio di Censo dilanti tur presente. E dia ey Haseth a acusa mr. Sharin Luydens di ta corupto. Es mas, el a bis’e cu si e no tabata corupto, cu e lo ta polis awe ainda. E director di Censo a harie y a puntr’e: “Haseth, net abo ta yama mi pa corupto?” No a dura ni 24 ora cu ya a presenta e situacion aki, den cual tur dede di corupcion y estafa awo ta riba e mesun de Haseth di Pueblo Prome.
Tocante John de Haseth (PP)
John Kenneth de Haseth, di 55 aña di edad, no ta nobo den politica na Aruba. El a aparece prome biaha riba lista di Partido PPA den eleccion di aña 2013 como candidato #18 y a haya solamente 3 voto riba su nomber. Den eleccion na aña 2017, el a baha riba e lista di candidato #18 pa candidato #19 pero a redobla su votonan personal di 3 pa 6 voto individual! Pa e eleccion aki el a dicidi di bandona PPA y a uni su mes na partido Pueblo Prome y a postula su mes como candidato #11 riba lista.
Tocante Pueblo Prome
Dia 22 di maart 2021 a funda partido Pueblo Prome, cu lo participa den eleccion parlamentario na 25 di juni binidero. Michael Wiliams ta presidente di bestuur compaña pa Jan de Ruijter y demas personahenan cu a yuda lanta e partido. A entrega un lista di 12 candidato pa e siguiente eleccion, di cual Michael Williams mes ta lider di e partido politico.
