Awe partido Union Patriotico Progresista (UPP) a logra haya sosten di 587 ciudadano, cu ta haci nan cla pa participa den e siguiente eleccion parlamentario di Aruba, dia 25 di juni 2021. E lider nobo di partido, Seraida Pemberton, a bisa di ta hopi contento. Su palabra pa pueblo di Aruba ta “Hopi danki.”
Pa nan e ta un logro grandi. Nan ta trahando cu un bon team pa hunto hiba Aruba padilanti. Pa nan, e sosten di firma ta nifica cu Aruba ta cla pa algo diferente y algo nobo den parlamento. Nan ta aprecia cu Aruba a cuminsa realisa cu nan por haci un cambio.
Mayoria hende ta bisa cu nan kier un cambio. Seraida Pemberton ta pidi e votadonan pa wak e ‘tracking record’ di cada partido, wak kico nan a aporta pa Aruba y no pa un persona individual. A base di esey por haci un escogencia pa un partido cu lo por duna e pueblo di Aruba e atencion necesario. Pa UPP e prioridad ta hobennan, grandinan, salud mental y economia. Tin diferente area cu mester atencion. Aruba mester sinti cu tin cambio.
“Danki na ful Aruba, pa e sosten.” Pemberton a pidi pa sigui sali y sostene e partidonan cu falta pasobra esey kiermen cu tin mas alternativa pa pueblo por scoge.
Booshi Wever ta contento
Ex-minister y alabes ex-parlamentario drs. Booshi Wever ta contento con cos a bay, pero na mes momento e sa cu awo e trabou mes ta cuminsa. UPP tin hopi aña ta papia e mesun idioma, awo ta momento pa UPP saca probecho di tur e trabou cu nan a haci tur tempo, di concientisa e pueblo cu e unico manera di sali di e abismo aki ta bon gobernacion.
Tur 13 candidato a percura pa busca hende pa firma. Booshi Wever ta sinti cu nan a demostra cu nan por. Nan lo mester keda cla riba algun cos chikito y despues e lider mes lo anuncia kico nan lo sosode siguientemente. Awo e trabou real ta cuminsa, e trabou di convence pueblo. El a haci un yamada na pueblo pa no bay tras di promesanan falso, locual UPP ta priminti ta un control debido di parlamento.
CARTA ENTREGA NA GOBERNADOR
Booshi Wever tin su opinion personal pa loke ta trata votacion digital, e ta completamente contra. No tin nada ta indica cu manera cu e ta awo, ta malo. E chens pa fraude ta masha poco. Pa Booshi Wever, esaki no ta momento pa votamento digital.
UPP tin lider nobo
E co-fundadonan di e partido politico, esta Booshi Wever y Reymond Hernandez, a pasa e liderazgo na e persona cu nan ta kere ta esun cu por lidera e partido. A haci e traspaso simbolico na cas di Wever, unda a scog’e como lider. Dia 5 di mei a pasa e liderazgo di UPP via un antorcha pa Seraida Pemberton-Leonard, kende a bisa di sinti su mes honra p’esaki.
Tocante UPP
Drs. Candelario “Booshi” Wever & Raymond Hernandez a funda Union Patriotico Progresista (U.P.P) na aña 2013. Lider desde su fundacion ta Drs. Candelario “Booshi” Wever y a participa 2 biaha den eleccion. Record maximo di voto: 805 (2013) y Record minimo di voto: 656 na 2017 (lista combina cu PPA). Dia 5 di mei ultimo a pasa e liderazgo over na Seraida Pemberton. Ideologia di UPP ta Social Democrata.
