Comunidad Dominicano ta conmemora 157 aniversario di restauracion di Republica Dominicana. Fundacion Dominicana Arubanse Juan Pablo Duarte hunto cu consul di Republica Dominicana y Partido Revolucionario Dominicano a bini hunto n’e Plaza Juan Pablo Duarte pa un acto di ofrenda floral.
Wilston Tavarez, presidente di Fundacion Dominicana Arubaanse Juan Pablo Duarte, a splica cu dia 16 di augustus a conmemora e di 159 aniversario di dia di restauracion di Republica Dominicana. Nan ta hopi contento y agradecido p’e dia di aki, p’e acogida cu tabatin di tanto e Fundacion Dominicana Arubaanse Juan Pablo Duarte, miembro di comunidad, a conta cu presencia di consulado Dominicano y Hunta di Bombero di San Nicolas.
Pedro Ventura, consul di Republica Dominicana pa Aruba, a bisa cu e presidente di Republica Dominicana den dos aña di gestion, ta duna un detaye di kico tur a haci. Loke ta concerni e isla di Aruba, nan a logra hopi cos. Awo por haya paspoort den dos siman di tempo, tin seguro di salud. A trece e Hunta Central, cu ta encarga pa duna e acta di nacemento, cedula y tur loke mester pa haya un paspoort.
A logra hopi cos, pero semper falta algo. P’e dos aña cu Ventura ta aki, e Dominicanonan ta trankil y ta compronde cu nan ta haciendo e trabou. Loke e desaroyo ta significa ta cu tin un bon relacion cu gobierno. Na diferente ocasion a reuni cu prome minister, cu gobernador interino, director di Warda Nos Costa. Semper ta purba di renoba y uni loke ta un relacion entre un pais cu otro.
Edward McCollum, presidente di Partido Revolucionario Dominicano, a splica cu nan a pone un ofrenda floral na Plaza Juan Pablo Duarte. A haci esey den conmemoracion emotivo di restauracion di Republica Dominicana. El a splica un tiki di e historia unda cu dia 16 di augustus 1863 a cuminsa un revolucion, un enfrentamento di liberacion di Republica Dominicana, cu tabata anexa na Spaña pa general Pedro Santana cu antes tabata Trinitario hunto cu Juan Pablo Duarte.
McCollum a splica riba e traicion cu tabatin, di e guera cu a cuminsa den un sero y esaki a termina dos aña despues, esta na 1865. Asina aki a bini e di dos Republica, di cual e ta pidi tur Rubiano y Dominicano lesa e historia di libertad. Republica Dominicana ta celebra nan 157 aña cu a independisa di Spaña y 159 fo’i su inicio.
Pa mas lesa TREMPAN.COM
