Albert Ramey Geerman a yega Aruba pa entiero di su ruman homber Anthony Carty, alias Juni Maton, asesina dia 4 di december ultimo. Dia 11 di december a hay’e cu arma, cu a pone autoridadnan actua mesora pasobra tabatin informacion cu e lo a bini pa regla cuenta. Den Corte a hay’e culpabel y pa su suerte el a haya un castigo cu ta haci cu e ta liber caba.
Juni Maton mes a perde su bida dia 4 di december den un club nocturno ora cu su agresor, despues di un discusion, a los dos tiro riba dje cu a resulta fatal. Esey tabata e di tres asesinato pa 2022.
Despues di e asesinato y durante e entiero tabatin hopi vigilancia policial pasobra ya caba a haya informacion cu e ruman Albert a laga sa cu e ta bini pa venga morto di Juni.
A acusa Geerman cu dia 11 di december 2022 e tabatin un arma di candela (revolver) cu 5 bala den dje. Manera nan ta bisa, e arma tabata cla pa uza. A haya e arma aki despues cu a bay listra na e cas di su mama, unda e ta keda y esaki tabata bou di un cushinchi. Pero e acusado ta nenga di tabata kier a uza e arma. Mas bien e kier a destrui esaki pa evita cu tin otro tragedia ta sosode. Pero e no a haya e chens, pasobra polis a descubrie prome.
E tabata sa unda cu su ruman tabatin e arma scondi, den un mondi na Tanki Leendert. Berdad el a haya esaki lora den un paña y no tabata completamente dera. “Mi no tabata kier pa otro hende haya e arma y uz’e”, el a bisa hues. Su intencion tabata pa tira e arma den lama banda di Zeewijk. Pero prome cu el a bay aya, el a pasa na cas di su mama na Pos Chikito. Y hustamente un rato despues polis a yega, prome cu e por a ehecuta su plan.
Hues a bisa e acusado cu el a scucha su version pero cu e por kere cu el a bini di Hulanda cu hopi dolor pa asesinato di su ruman. E no ta mustra bon cu e prome cos cu e ta bay haci ta busca e arma cu su ruman a cont’e unda e ta scondi.
Fiscal a cuestiona splicacion di e acusado, principalmente pasobra e arma tabata arma y cla pa tira. Y no ta compronde, cu si e kier evita mas problema, e no a entrega e arma na polis. Esaki ta algo cu e no a pensa, segun e acusado.
A bini dilanti tambe cu e acusado ta nenga rotundamente pa listra den su celular, pasobra e ta contene hopi cosnan priva. Pero esaki no ta yud’e, pasobra a mand’e Corsou pa investigacion forensico. Y a advirtie cu si haya algo ilegal den dje, lo tin un otro caso penal contra su persona.
Tambe a constata cu no ta prome biaha e tin contacto cu husticia. Na 2019 a acus’e di intento pa mata, uzando un arma di candela. Pero no tabatin prueba suficiente pa conden’e. Si a haya condena pa menasa.
Awo pa loke ta e caso aki, fiscal no ta kere su version cu el a bay busca e arma pa deshaci di esaki. Tin hopi version cu el a bin pa tuma venganza contra e gang cu ta responsabel pa morto di su ruman.
A hay’e cu arma di candela y e acusacion ta proba.
Normalmente Hof den tipo di casonan asina ta duna nuebe luna di castigo. Si e arma ta warda un caminda, p.e.den un cashi. Pero si e ta den su poder den auto, e ta haya 15 luna. Awor aki ta papia di un arma cu tabata cla pa tira y den un tas. Pues pa e sali cu ne cualkier momento. P’esey a dicidi di pidi 12 luna di cual tres luna ta condicional. Y cu tres aña di prueba.
Hues a dicidi di cera tratamento y dicta sentencia di biaha. Contrario na loke fiscal ta pensa cu ta trata di un arma den cas, pa cual Hof normalmente ta pidi nuebe luna. E hues den Corte di Prome Instancia a impone bira duna e acusado nuebe luna di prizon di cual tres luna ta condicional y cu tres aña di prueba. Y naturalmente a duna ordo pa destrui e arma di candela.
